Ўз фарзандларига алимент тўлайдиган оталар кўпчиликни ташкил қилади. Аммо, фарзандидан алимент оладиган ота-оналар кам. Бу ҳамма фарзандлар ота-онасига меҳрибон деганимас албатта. Шунчаки, фарзандимга оғирим тушмасин, болам қийналмасин дейдиган ота-оналар кўплигидан.

Ўзбекистон Республикасининг янги таҳрирдаги конституцияси 80-моддасида вояга етган меҳнатга лаёқатли фарзандлар ўз ота-оналари ҳақида ғамхўрлик қилишга мажбурлиги айтилган.

Оила кодексининг 110-моддасида вояга етган, меҳнатга лаёқатли болалар ўз ота-онасига ихтиёрий равишда моддий ёрдам беришдан бўйин товласалар, таъминот миқдори болаларнинг оилавий ва моддий аҳволини ҳисобга олган ҳолда суднинг ҳал қилув қарорига асосан белгиланиши кўрсатиб ўтилган.

Фарзандидан ҳақини талаб қиладиган ота-оналар ҳам йўқ эмас.

Шовот туманлараро судига мурожаат қилган ота фарзандларининг эътиборсизлиги оқибатида қариган чоғида моддий таъминотсиз қолдиришгани учун алимент ундириб беришларини сўради.

“Фарзандларимни вояга етгунига қадар тарбиялаб, ҳар томонлама таъминлаб келдим. Лекин ҳозирги кунга келиб нафақага чиққанимда ва касал ҳолимда фарзандларим ҳолимдан умуман хабар олмай қўйишди. Оладиган нафақа пулим етмаяпти. Моддий томондан қийналиб қолдим” дейди ота.

Муаммо қонуний асосда ҳал этилди. Суд қарорига кўра, фарзандлар отага алимент тўлайдиган бўлишди.

Бу воқеани эшитган кишида нега аҳвол шунчаликка борди деган савол туғилиши мумкин. Гап шундаки, М.Т. турмуш ўртоғи билан 20 йиллик турмушдан кейин қонуний ажрашган. Тўрт нафар фарзанди она қарамоғида қолган. Ота эса уйида битта ўзи яшаган.

Куч-қувватдан қолган ота энди эътиборга муҳтож. Унинг оиласига, онасига қилган ноҳақлигини кечиролмаган фарзандлар отани унутишган. Қонун ёрдамида ота моддий таъминотга эга бўлди. Бироқ, қонун фарзандлар меҳрини кафолатлай олмайди.

Афсуски, атрофимизда бемеҳр оталар, оқибатсиз фарзандлар йўқ эмас. Бу воқеа уларга сабоқ бўлади деган умиддамиз. Зеро, “экканингни ўрасан” дейди доно халқимиз.

Муҳаббат ТЎРАБОЕВА
ISHONCH.UZ