Хусусан, янги йилдан бош­лаб камида 15 йил стажга эга бўлган олий тои­фали педагогларга ипотека кредити бошланғич бадалининг 25 фоизи қоплаб берилиши, келгуси ўқув йилида педагогларнинг олий ўқув юртларига ўқишга кирган фарзандларининг контракт суммасига 30 фоиз чегирма берилиши, ўқитувчилар янги таълим технологияларини кенг қўллаши учун компьютер харидига 10 миллион сўмгача имтиёзли кредит ажратилиши, педагоглар учун давлат хизматлари тўлови 2 карра камайтирилиши, фан ўқитувчилари каби бошланғич таълим ўқитувчиларига ҳам миллий сертификат бериш тизими жорий этилиши ҳақида хабарлар тарқалган эди.

Шунингдек, сертификат олганларга ҳар ойда 15 фоиз устама тўланиши, бакалавр босқичини имтиёзли диплом билан битириб, мактабга ишга кирганларга автоматик равишда 2-малака тоифаси, магистрларга эса 1-малака тои­фаси берилиши, дунёдаги ТОП-300 талик олий таълим муассасасига ўқишга кирган педагогларга 20 минг долларгача имтиёзли таълим кредити ажратилиши, рейтингда 100 таликка кирган мактаб ва боғча, 20 таликдаги техникум, ТОП-10 та олий таълим муассаси педагогларига йилига бир марта Ўзбекистон бўйлаб саёҳат қилиш учун самолёт ва поездлар чипта нархларига 15-20 фоиз чегирма берилиши қайд этилганди.

Аслида ўқитувчи ва мураббийларни ҳар томонлама қўллаб-қувватлаш энг муҳим масала. Чунки Ватан ва Миллат келажагини айнан улар белгилайди. Шунинг учун улар ҳар доим ва ҳамиша ҳурмат ва эъзозда бўлиши шарт.

Мана янги йилнинг дастлабки ойи ҳам ўз поёнига етиб бормоқда. Аммо шу чоққача имтиёзлар кучга кирган ёки кирмагани ҳақида бирон-бир янгилик эшитмадик. Мактабгача ва мактаб таълими вазирлиги эса ҳануз бу ҳақда изоҳ бергани йўқ.

Хўш, педагог ходимларга берилган имтиёзлар кучга кирдими? Бунинг учун норматив-меъёрий ҳужжат тайёрландими? Шундай бўлса, нима учун расмий ёки бошқа очиқ манбаларда эълон қилинмади? Нега бу ҳақда ҳеч қандай маълумот йўқ?