Ушбу саволга Ўзбекистон Соғлиқни сақлаш ходимлари касаба уюшмаси Республика Кенгашининг Хоразм вилояти бўйича меҳнат ҳуқуқ инспектори Расулбек Аллаберганов жавоб беради.

Меҳнат кодексининг 253-моддасида иш ҳақи ҳар ярим ойда камида бир марта тўланиши шартлиги кўрсатилган.

Ойлик иш ҳақи, одатда, икки қисмга бўлиб тўланади: биринчи қисми — аванс (бўнак), иккинчи қисми — ойликнинг қолган қисми. Бу икки тўлов орасидаги танаффус 16 кундан ошмаслиги керак. Иш ҳақи тўлаш муддатлари жамоа шартномасида ёки иш берувчининг ички ҳужжатларида белгиланади. Агар бундай ҳужжатлар мавжуд бўлмаса, тўлов муддатлари меҳнат шартномасида кўрсатилади
Айрим тоифадаги ходимлар учун иш ҳақи ойига бир марта тўланиши мумкин. Бундай тоифалар Ўзбекистон Республикаси Вазирлар Маҳкамаси томонидан белгиланади.

Агар иш ҳақи тўланадиган кун дам олиш ёки ишланмайдиган байрам кунига тўғри келса, тўлов ушбу кунлардан олдин амалга оширилиши шарт.

Ходимнинг иш ҳақи ўз вақтида ва тўлиқ тўланиши бошқа тўловлар мавжудлигига ёки уларнинг навбатига боғлаб қўйилиши мумкин эмас.
Агар иш ҳақи ёки бошқа тўловлар кечиктирилса, иш берувчи ходим олдида моддий жавобгар бўлади. Бунда ҳар бир кечиктирилган кун учун Ўзбекистон Республикаси Марказий банкининг амалдаги қайта молиялаштириш ставкасидан келиб чиққан ҳолда пулли компенсация тўланади. Пулли компенсация миқдори, қоида тариқасида, қайта молиялаштириш ставкасининг 10 фоизи этиб белгиланган.

Бу миқдор жамоа шартномаси, ички ҳужжат ёки меҳнат шартномаси билан оширилиши мумкин. Шуни ёдда тутиш керакки, иш берувчининг иш ҳақи кечикишида айби бор ёки йўқлигидан қатъи назар, компенсация тўлаш мажбурияти юзага келади.