“Ўзбекистон Республикаси Миллий гвардияси тўғрисида”ги қонунга ўзгартиш ва қўшимчалар киритиш режалаштириляпти.
Бу борадаги ҳужжат лойиҳасида қайд этилишича, Миллий гвардиянинг асосий вазифалари 12 тадан 9 тага тизимлаштирилиб, янги таҳрирда баён этилади.

Бунда Миллий гвардиянинг бошқа давлат органи ваколатига кирадиган 2 та ҳуқуқлари (ахборотлаштириш техника воситаларини ҳамда ахборотни техник жиҳатдан ҳимоя қилиш воситаларини сертификатлаштиришга) чиқариб ташланади.

Қонунинг “Фуқароларнинг ҳуқуқлари, эркинликлари ва қонуний манфаатларига риоя этиш ҳамда уларни ҳурмат қилиш принципи” номли моддаси жамоатчилик фикрини инобатга олган ҳолда, Миллий гвардия ҳарбий хизматчиси (ходими) фуқарога мурожаат этганида “ўзини таништириш тартиби” билан тўлдириляпти. Яъни ходим фуқарога мурожаат этганида ўз лавозимини, унвонини, фамилиясини, исмини, отасининг исмини айтиши, фуқаронинг талабига кўра хизмат гувоҳномасини кўрсатиши, шундан сўнг мурожаат қилишининг сабаби ва мақсадини маълум қилиши кераклиги белгиланяпти.

Шу билан бирга Миллий гвардия ҳарбий хизматчилари ва ходимларига махсус воситаларни қўллашда “резина таёқлар” билан биргаликда “махсус таёқлар”дан ҳам фойдаланишга рухсат берилади.