Jumladan, oqqo‘rg‘onlik I.Usmonova ham “Ishonch telefoni” orqali ishini bitirganlardan.

U tumandagi “ECE TEXTILE” MChJ korxonasida tikuvchi bo‘lib ishlardi. Ilgari oylik maoshini o‘z vaqtida olib yurgan tikuvchiga birdaniga salkam ikki davomida maosh berilmadi.

Shundan so‘ng, I.Usmonova O‘zbekiston kasaba uyushmalari Federatsiyasining Xotin-qizlar muammolari bilan ishlaydigan – 1211-Ishonch telefoniga qo‘ng‘iroq qildi.

– Bu masalada korxona rahbariyatiga bir necha marta murojaat qilgan bo‘lsam ham, natija bo‘lmadi, – deydi u. – Lekin maoshini ololmagan boshqa ishchilarga ish haqqilari berilayotganligini eshitdim. Shu sababli ham, Ishonch telefoniga qo‘ng‘iroq qilgan edim. Hech qancha vaqt o‘tmay, pulimni undirib berishdi, kasaba uyushmalariga katta rahmat!

Toshkent viloyati Kambag‘allikni qisqartirish va bandlik boshqarmasi maʼlumotiga ko‘ra, murojaat darhol o‘rganib chiqilgan va Oqqo‘rg‘on tumanida joylashgan “ECE TEXTILE” MChJdan I.Usmonovaning joriy yilda ishlagan – jami 3 mln. so‘mdan ziyod mablag‘i to‘liq undirib berilgan. Endilikda unga ish haqi oyma-oy to‘lab borilishi maʼlum qilindi.

* * *

Shuningdek, Xorazm viloyati Yangibozor tumanida yashovchi Gulandom To‘raeva ham imtiyozli chorva krediti olish uchun bir necha eshikni taqillatishiga to‘g‘ri kelgan.

Tanishlari chorva krediti olib, sharoitlarini ancha tiklab olganini ko‘rib, u ham turmush o‘rtog‘i bilan maslahatni bir joyga qo‘ygan va imtiyozli kredit olsak, qo‘ymi, qoramolmi boqsaq, bolalarga sut-qatiq bo‘lardi harna, deyishgandi.

Shu ilinjda so‘rab-surishtirib zarur hujjatlarni to‘pladi. Biroq, “Qoratepa” MFY hokim yordamchisi hali limit ochilmaganini aytib, tavsiyanoma bermadi. Bank esa kafil talab qildi.

“Prezidentimiz shuncha sharoit yaratib qo‘ygan bo‘lsa, nimaga men foydalanmasligim kerak”, - derdi o‘ziga o‘zi Gulandom.

O‘ylab-o‘ylab, O‘zbekiston kasaba uyushmalari Federatsiyasi qoshidagi “1211” ishonch telefoniga qo‘ng‘iroq qilishga qaror qildi.

Gulandomning ishlari tezda yurishib ketdi. Hokim yordamchisi xonadoniga kelib, chorvachilik bilan shug‘ullanish uchun mavjud shart-sharoitlarni ko‘zdan kechirdi. Ayolning homilador ekanligi inobatga olinib, uning roziligi va tavsiyasi asosida loyihani turmush o‘rtog‘i nomiga rasmiylashtirish maqsadga muvofiq deb topildi.

Shu asosda, Mansurbek Zaripov nomiga 30 million so‘m miqdorida imtiyozli kredit ajratish haqida tavsiyanoma berildi. Qisqa fursatda tijorat banki tomonidan chorvachilik yo‘nalishida kredit mablag‘lari ajratilishi taʼminlandi.

Shu tariqa, muammo o‘z echimini topdi. Yana bir oila o‘z ro‘zg‘orini butlab oladigan bo‘ldi.