Yurtimizda daraxt va ko'chatlar ekish bo'yicha keng ko'lamli ishlar olib borilmoqda. O'zbekiston tumani ham bu jarayondan chetda qolmayapti, joylarda yangi yashil makonlar barpo etilmoqda. Albatta, bu quvonarli. Ammo tuman markazida joylashgan istirohat bog'i atrofidagi ko'p yillik chinorlarning tag qismi asfal't va beton qoplamasi bilan yopib tashlanganini ko'rib, maqsad daraxt ekishmi yoki uni nobud qilishmi, deb o'ylab qolasiz.

Bu ham yetmagandek, istirohat bog'i atrofida savdo shoxobchalari qurilgach, ayrim daraxtlar do'kon ichida qoldi.

«Qafas»da qolgan daraxtlarning taqdiri ham do'kon egasining qo'lida qolgandek go'yo. Manzaradan ko'rinadiki, do'kon ichidagi daraxtlarning sog'lom o'sishiga yo'l qo'yilmagan, u xuddi «dekarativ»ga aylantirilgandek. Endi o'ylab ko'ring, tanasi quyosh nuridan mahrum bo'lgan, ko'zga xunuk ko'rinmasligi uchun har ko'yga solingan daraxt ko'pga bormasligi tayin-ku?
Yuqoridagi holatdan tuman ekologiya bo'limi xabardormi? Savdo shoxobchalari qurishdan avval qanday talablar qo'yilgan? Daraxtlarni do'kon ichida qoldirish qanchalik to'g'ri? Tag qismi betonlab, asfal'tlangan va do'kon ichida qolgan daraxtlar tuman hokimligidan nari borsa, 300 metr uzoqlikda joylashgan.

Shinorlar – faqat ko'rkamlik ramzi emas, balki tabiat va inson salomatligi bilan bog'liq muhim omildir. Har bir daraxt – tuman aholisi uchun sog'lom muhit va toza havodir. Agar tabiatni asrab-avaylamasak, millionlab daraxt ekishdan ham ma'no yo'q.

O'ylaymizki, tuman mutasaddilari hali chinorlar qurib qolmasidan mazkur holatni nazoratga olishadi.

Jamshid ERGAShEv
«ISHONCH»