Qarshida yangi musobaqa: Qo'l jangi bo'yicha “Amir Temur kubogi” xalqaro turniri yuqori saviyada o'tdi
Qarshi shahridagi amfiteatrda professional qo'l jangining “R1” yo'nalishi bo'yicha ilk bor “Amir Temur kubogi” xalqaro turniri tashkil etildi.
Unda mamlakatimiz terma jamoasi a'zolari Shveytsariya, Сhexiya, Belarus', Tojikiston, Ozarboyjon va Qozog'iston termasi vakillari bilan jang olib bordi.
Jumladan, Asadbek Hikmatov Azad Mustafoevni (Ozarboyjon), Nilufar Polvonova Martina Ptasekni (Сhexiya), Abror Qayumov Baxtiyor Gayasovni (Tojikiston), Og'abek Qodirov Sedrik Douseni (Shveytsariya) mag'lub etdi. Afsuski, hamyurtimiz Elyor Komilovning belaruslik Vadim Ralichga qarshi jangi omadsiz yakunlandi.
Xalqaro turnirning oxirgi, asosiy bahsida qashqadaryolik jangchi, jahon chempioni Olimjon Normurodov qozog'istonlik Koshen Akanov bilan ringga chiqdi. Besh raundlik jang o'zbekistonlik jangchi foydasiga hal bo'ldi.
G'oliblar va xalqaro turnir ishtirokchilari tegishli pul mukofotlari bilan taqdirlandi.
”Amir Temur kubogi” turniri chog'ida Xalqaro qo'l jangi federatsiyasi prezidenti Sergey Astaxov ishtirok etdi.
Nufuzli mehmon xalqaro turnirni yuqori saviyada tashkil etgani va sport turini rivojlantirishga qo'shayotgan hissasi uchun Qashqadaryo viloyati hokimi Murotjon Azimov hamda viloyat qo'l jangi federatsiyasi raisi Jo'rabek Noralievga Qora belbog' va maxsus sertifikatlarni topshirdi.
Mazkur musobaqa an'anaviy bo'lib qoladi. Turnirni keyingi yillarda Buxoro va Samarqand shaharlarida o'tkazish belgilangan.
Akmal ABDIEV
Maqolaga baho bering
0/50
0
0
0
0