2024 yildan boshlab har yili an'anaviy tarzda voleybol bo'yicha Markaziy Osiyo davlatlari o'rtasida umumiy mukofot jamg'armasi 50 ming AQSh dollari bo'lgan O'zbekiston Prezidenti sovrini uchun “Buyuk Ipak yo'li” xalqaro turniri o'tkaziladi. Bu haqda Prezidentning tegishli qarori loyihasida belgilab qo'yilmoqda.

Shuningdek, qaror loyihasida har yili talaba va o'quvchilar o'quvchilari o'rtasida “volleyball stars” O'zbekiston kubogi, vazirlik va idoralar xodimlari o'rtasida uch bosqichli (tuman va shahar – viloyat – respublika) “Yangi O'zbekiston” respublika musobaqasi hamda “O'quvchilar ligasi” va “Talabalar ligasi” musobaqalarini o'tkazish rejalashtirilmoqda.

Bundan tashqari manzil koloniyalarda jazoni o'tayotgan mahkumlarning bo'sh vaqtlarini samarali tashkil etish hamda ularning tuzalish yo'liga o'tishiga ko'maklashish maqsadida mahkumlar o'rtasida voleybol sport turlari bo'yicha tajriba tariqasida “Yagona maqsad” shiori ostida hududiy va respublika musobaqalarini o'tkazib boriladi.

Hujjat bilan O'zbekistonda voleybol, sohil voleyboli va para voleybol sport turlarini rivojlantirishning asosiy yo'nalishlari belgilab olinmoqda.

Yoshlar siyosati va sport vazirligi tizimida voleybol sport turlari bo'yicha iqtidorli yosh sportchilarni tanlab olish va ularni terma jamoalarga asosiy nomzod sifatida tayyorlashni nazarda tutuvchi O'zbekiston voleybol sport turlarini rivojlantirish markazi tashkil qilinadi.

Markaz kelgusi o'quv yilidan faoliyatini boshlaydi va 180 nafargacha bo'lgan 5-11-sinf o'quvchilarini qamraydi.