Olimpiya va Paralimpiya, Osiyo va Paraosiyo o'yinlari dasturiga kiritilgan sport turlari bo'yicha O'zbekistonning sport terma jamoalari asosiy yoki zaxira tarkibiga kiritilgan hamda tegishli mezonlarga mos keluvchi sportchilarga har oylik stipendiya berish rejalashtirilyapti.

Qayd etilishicha, stipendiya tayinlash uchun Stipendiya komissiyasi tuziladi va u stipendiyaga nomzod sportchilarning ro'yxatini shakllantirish hamda stipendiya tayinlashga mas'ul hisoblanadi.

Stipendiya miqdori mehnatga haq to'lash eng kam miqdorining 3 baravari etib belgilanadi.

Hujjat loyihasiga ko'ra, 2023 yil oktyabr' oyidan boshlab, stipendiyani tayinlash va to'lash bilan bog'liq xarajatlar “sportchi” lavozimi uchun belgilangan ish haqi, terma jamoalar va ularning zaxirasi, sportchilar energiya sarfini qoplash va jismoniy resurslarini tiklash uchun ajratiladigan maqsadli to'lovlarni maqbullashtirish hisobidan qoplanadi.

2024 yildan boshlab esa stipendiya bilan bog'liq xarajatlar Davlat byudjeti parametrlarini shakllantirishda Vazirlikning xarajatlari smetasida nazarda tutiladi.

Mazkur hujjat bilan stipendiyaga nomzodlar 20 turdagi sport musobaqalarida sovrinli o'rinlarni egallagan sportchilar orasidan tanlab olinadi.

Ma'lumot uchun, mazkur stipendiya Olimpiya va Paralimpiya o'yinlarida sovrindor bo'lganligi uchun umrbod oylik to'lovlar tayinlangan sportchilar hamda Milliy olimpiya qo'mitasi va Milliy paralimpiya qo'mitasi mablag'lari hisobidan stipendiya ko'rinishida har oyda to'lanadigan to'lovlar tayinlangan sportchilarga nisbatan tatbiq etilmaydi.

Eslatib o'tamiz, Yoshlar siyosati va sport vaziri buyrug'i loyihasi jamoatchilik muhokamasi uchun e'lon qilingan bo'lib, imzolanganidan keyin huquqiy kuchga ega bo'ladi.