Bugun, 26 mart kuni O'zbekiston Respublikasi Raqamli texnologiyalar vazirligi, O'zbekiston axborot texnologiyalari va ommaviy kommunikatsiya xodimlari kasaba uyushmasi respublika Kengashi tomonidan tashkil etilgan minifutbol bo'yicha musobaqaning respublika bosqichi start oldi.

Muxammad al-Xorazmiy nomidagi Toshkent axborot texnologiyalari universitetida bo'lib o'tayotgan ushbu musobaqada Raqamli texnologiyalar vazirligiga kiruvchi aktsiyadorlik jamiyati, kompaniya, korxona, tashkilot va muassasalarning xodimlaridan tuzilgan jami 16 ta jamoa, 160 nafardan ziyod o'yinchilar ishtirok etmoqda.

— Bu musobaqada quyi bosqichlarda g'olib bo'lib, eng yaxshi natijalarni qo'lga kiritgan xodimlar ishtirok etmoqda, — deydi O'zbekiston Axborot texnologiyalari va ommaviy kommunikatsiya xodimlari kasaba uyushmasi respublika kengashi bosh mutaxassisi Yunus G'ofurov. — Musobaqa 29 mart kuniga qadar davom etadi. O'sha kuni final bosqichi bo'lib o'tadi, g'oliblar aniqlanib, taqdirlanadi.

Tizimdagi barcha xodimlarning salomatligini muhofaza qilish, qolaversa, ular o'rtasida o'zaro do'stlik, hamjihatlik aloqalarini mustahkamlash maqsadida tashkil etilgan ushbu sport tadbirining yakuni bo'yicha batafsil ma'lumot beriladi.

Xolida Egamberdieva,
Ishonch.uz