Xususan, safarning birinchi kunida “1520” kompaniyasi guruhlari bosh direktori o'rinbosari Dmitriy Bolotskiy, “Profayn” kompaniyasi bosh direktori Yelena Yermakova, “Russkiy Lyon” kompaniyasi ijrochi direktori Valeriy Misharin, “Prirodniy kamen'” kompaniyasi ta'sischisi Pyotr Zasedatelev bilan uchrashuvlar tashkil etildi.

Uchrashuvlar davomida temiryo'l uchun zarur bo'ladigan butlovchi va ehtiyot qismlar ishlab chiqarishni yo'lga qo'yish, “Navoiy” EIZ hududida qiymati
5 mln dollarlik eshik va derazalar hamda ehtiyot qismlari ishlab chiqarishni tashkil etish, zig'ir poyasi va paxta tolalari aralashmalaridan ip kalavadan boshlab tayyor mahsulotgacha ishlab chiqarish loyihalari, Navoiy viloyatidan Rossiya Federatsiyasiga tabiiy pardozbop toshlarni eksport qilish bo'yicha muzokaralar olib borildi.

Shuningdek, “Uralxim” kompaniyasi direktori o'rinbosari Andrey Gutorov bilan muzokara davomida Navoiy viloyatida kaliy nitrati va kaliy sul'fati loyihasini amalga oshirish istiqbollari muhokama qilindi. Kompaniya vakillariga viloyatning kimyo sanoatidagi mavjud imkoniyatlari xususida ma'lumot berildi.

Xizmat safari davomida Omsk viloyati gubernatori V.P. Xotsenko bilan uchrashuv tashkil etilib, Omsk va Navoiy viloyati o'rtasida savdo-iqtisodiy, ilmiy-texnikaviy, ijtimoiy, madaniy-gumanitar sohalarda xalqaro va tashqi iqtisodiy aloqalarni amalga oshirish bo'yicha maqsadli bitimlar imzolandi.

Shuningdek, safarning ikkinchi kunida viloyat delegatsiyasi “Omsk agrar ilmiy markazi” Federal davlat byudjet muassasasiga ham tashrif buyurib, bu yerda bug'doy, soya va boshqa qishloq xo'jaligi o'simliklarining yangi navlarini yaratish texnologiyalari bilan tanishdi. Ilmiy markaz direktori Maksim Сhekusov bilan muzokaralar olib borilib, natijada ilmiy markaz mutaxassislarining Navoiy viloyatiga tashrifi bo'yicha kelishib olindi.

Navoiy viloyati hokimi Normat Tursunov Rossiya safari doirasida Omskdagi o'zbekistonlik migrantlar bilan ham uchrashdi.

Viloyat hokimi vatandoshlarning u yerdagi yashash sharoitlari bilan yaqindan tanishdi, muammo va takliflarini tingladi. Vatanga qaytishni istaganlarga yordam ko'rsatilishi bo'yicha o'z takliflarini berdi.

Safarning uchinchi kunida delegatsiya a'zolari Moskva shahridagi bir qator korxonalar faoliyati bilan yaqindan tanishib, muzokaralar o'tkazdi hamda hamkorlik qilishga kelishib olindi.

Shuningdek, “Uralxim” kompaniyasi va “MPK komplekt tsentr” kompaniyalari bilan hamkorlikda loyihalarni amalga oshirish masalalarida muzokaralar olib borildi.

“Uralxim” kompaniyasi bilan 40 mln dollarlik nitrat va sulfat kaliy ishlab chikarish buyicha, “MPK komplekt tsentr” kompaniyasi bilan “Navoiy EIZda qiymati 35 mln dollarlik vagon g'ildiraklari uchun uskunalar ishlab chiqarishni yo'lga qo'yish bo'yicha kelishuvga erishildi.

Rossiya Federatsiyasida o'tkazilgan uchrashuv va muzokaralar natijasida 2 ta korxona bilan 75 mln dollarlik investitsiya va 8ta korxona bilan 76 mln dollarlik eksport shartnomalari tuzildi.