Yangi tahrirdagi Konstitutsiyada “inson – jamiyat – davlat” tamoyili, ijtimoiy davlat qurish masalasi mustahkamlangan, Bosh qomusimizda davlatning ijtimoiy majburiyatlari uch barobar ko'paytirilgan. Bugun Prezidentimiz tashabbusi bilan amalga oshirilayotgan islohotlar yangilangan Konstitutsiyamizda belgilangan “Inson qadri uchun” degan ustuvor tamoyilni to'la ro'yobga chiqarishga qaratilgan bo'lib, inson manfaatlarini mustahkamlash, ijtimoiy himoyasini kuchaytirish, shu jumladan fuqarolar uchun munosib mehnat sharoitlarini yaratish hamda mehnatga doir huquqlarni ta'minlashga xizmat qilmoqda.

Xalqaro mehnat tashkilotining O'zbekiston tomonidan ratifikatsiya qilingan konvensiyalari qoidalari hamda xalqaro standartlar milliy qonunchiligimizda o'z aksini topmoqda va amaliyotga joriy etilmoqda.

Qo'shma yig'ilishda fuqarolarning qonunchilikda belgilangan mehnatga doir huquqlarini muhofaza qilish, sohaga oid qonunchilikning amal qilinishini ta'minlash, qulay mehnat sharoitlarini yaratish hamda mehnat xavfsizligini kuchaytirishga doir masalalar ko'rib chiqildi.

Joylarda o'tkazilgan uchrashuvlarda bildirilgan fikr-mulohazalardan kelib chiqib, olis hududlarda yoki alohida tabiiy sharoitlarga ega bo'lgan hududlarda (vaxta usulida) mehnat qilayotgan, shuningdek noqulay mehnat sharoitlaridagi ish bilan shug'ullanayotgan fuqarolar mehnatini rag'batlantirish ustuvor vazifalardan biri ekanligi aytib o'tildi.

Shuningdek, yig'ilishda Suv ho'jaligi vazirligining yirik suv nasos stansiyalarida ishlayotgan fuqarolarning qonun hujjatlarida, shu jumladan Mehnat kodeksida, “Mehnatni muhofaza qilish to'g'risida”gi Qonunda kafolatlangan adolatli va xavfsiz mehnat sharoitlariga ega bo'lish, mehnat muhofazasini ta'minlash borasida amalga oshirilayotgan ishlar haqidagi axboroti ham eshitildi.

Deputatlar tomonidan murakkab mehnat sharoitlarida faoliyat yuritayotgan fuqarolar mehnatini moddiy qo'llab-quvvatlash, ish haqi va ustamalarning to'lanishini ta'minlash hamda ijtimoiy himoyasini yanada kuchaytirish zarurligi ta'kidlandi.