Bojxona qo'mitasi hamda DXX Сhegara qo'shinlari o'tkazgan tezkor tadbirda 9-fevral, yakshanba kuni Surxondaryo viloyati bojxona boshqarmasining “Ayritom” chegara bojxona posti orqali O'zbekiston hududidan tranzit tarzida o'tish uchun kirib kelgan yuk avtotransport vositasiga ortilgan 13,5 tonna og'irlikdagi supurgi xodimlar diqqatini tortadi.

Shundan so'ng mazkur avtotransport vositasi “Ayritom” chegara bojxona postiga tutash hududdagi “Termiz” tashqi iqtisodiy foaliyat bojxona posti tasarrufidagi bojxona omboriga keltirilib, undagi tovarlar to'liq bojxona ko'rigidan o'tkazildi.

Aniqlanishicha, yuk avtotransport vositasiga 180 ta qopda supurgi jo'xorisi o'simligidan tayyorlangan 22 ming 500 dona xo'jalik supurgilari ortilgan.

Mazkur supurgilarni sinchiklab ko'zdan kechirish davomida, 2 986 dona supurgilarning dastaklari orasiga aynan supurgi rangiga mos ravishda – sariq rangdagi skotch bilan o'ralgan o'rtacha 25 sm uzunlikdagi polietilen o'ramlar mohirlik bilan yashirilgani fosh bo'ldi.

Ushbu o'ramlar belgilangan tartibda va xolislar ishtirokida ochib ko'rilganida, ularning ichiga o'rtacha 200 gr. og'irlikdagi, o'tkir hidli, to'q jigarrangli giyohvandlik vositasi ekanligi ma'lum bo'ldi.

Mazkur holatda 2 986 dona supurgi dastaklaridan ajratib olingan o'ramlardagi modda dastlabki tezkor analiz natijalariga ko'ra “gashish” giyohvandlik vositasi bo'lib, ularning umumiy og'irligi 612 kiloni tashkil qilmoqda.

Dastlabki hisob-kitoblarga ko'ra, mazkur giyohvandlik vositasining qora bozorlardagi narxi taxminan 16,5 mln AQSh dollaridan oshadi.

Hozirda holat yuzasidan tergovga qadar tekshiruv harakatlari davom ettirilmoqda.