Toshkent shahar maktabgacha va maktab ta'limi boshqarmasi bergan rasmiy ma'lumotga ko'ra, ushbu holat haqiqatda poytaxtning Sergeli tumanida joylashgan 6-sonli maktabda kuzatilgan.

“Poytaxtimizdagi barcha davlat umumta'lim maktablarida darslar to'liq bepul o'tiladi. Faqatgina har bir ta'lim muassasasida byudjetdan tashqari mablag' topish maqsadida o'quvchilarga darsdan keyin Hukumatning 2019-yil 22-apreldagi “Xalq ta'limi vazirligi tizimidagi umumiy o'rta ta'lim muassasalarida pullik ta'lim xizmatlarini ko'rsatish tartibi to'g'risida”gi 343-sonli qarori bilan tasdiqlangan Nizomga binoan shartnoma asosida pullik qo'shimcha to'garaklar hamda mashg'ulotlar o'tish, kuni uzaytirilgan guruhlar faoliyatlari yo'lga qo'yilgan”, – deyiladi axborotda.

Qayd etilishicha, ayni paytda Sergeli tumanidagi 6-sonli ixtisoslashtirilgan davlat umumta'lim maktabida ham yuqoridagi Qaror asosida bir qator ishlar amalga oshirilyapti. Maktabda an'anaviy darslar bepul olib boriladi. Ota-onalarning istak-xohishlariga ko'ra esa ta'lim maskanida maktab bilan tuzilgan o'zaro shartnoma asosida pullik qo'shimcha darslar, to'garaklar, kuni uzaytirilgan guruhlar tashkil etilgan.