– Рўзғорим катта, 3 нафар фарзандим контракт асосида олий таълим муассасида таълим олади, – дейди Тўлқин Ризаев. – Уч талабанинг харажатларига, шартнома тўловларига ойлик маошим камлик қилиб қолди. Оилада бир ўзим ишлайман. Фаолиятим давомида бирор марта Касаба уюшмаларидан моддий ёрдам олганим йўқ эди. Бироз мадад бўлар деган умидда федерациянинг 1211 “Ишонч телефони”га мурожаат қилиб, турмуш шароитимни тушунтирдим. Касаба уюшмаси аъзоси эканимни инобатга олиб, моддий ёрдам ажратишларини сўрадим.

Ишноч телефонига қилинган мурожаат тезлик билан назоратга олинди. Уни ўрганиш, белгиланган тартибда ечим топиш Ўзбекистон Давлат муассасалари ва жамоат хизмати ходимлари касаба уюшмасининг Қашқадарё вилояти кенгаши зиммасига юклатилди. Натижада Тўлқин Ризаевга Ижтимоий ҳимоя миллий агентлиги Қашқадарё вилояти бошқармаси касаба уюшмаси қўмитаси маблағлари ҳисобидан 2 миллион сўм моддий ёрдам кўрсатилди.

– Ростини айтсам, мурожаатимга тезкорлик билан ижобий ечим топишларига унча ишонмагандим, – дейди Тўлқин Ризаев. – Мен тизим ходимларидан миннатдорман. Юртимизда инсон қадри улуғлангани, ҳар бир фуқаронинг мурожаатларига жиддий эътибор қаратилаётганини ўз ҳаётим мисолида ҳис қиляпман. Касаба уюшмаси ҳақидаги ишончсизлик кайфиятидаги тасаввурларим ҳам барҳам топди.

Ҳар бир мурожаат ортида инсоннинг орзу-умидлари туради. Уларни ўрганиш ва ижобий ҳал этиш эса халқ орасида ташкилотнинг нуфузини оширади. Жамият ва давлат ўртасидаги ишонч муҳитини мустаҳкамлайди.

Баҳодир ҲАЛИМОВ,
“ISHONCH”