Аёл учун энг катта мусибат – бу оиладаги нотинчлик. Нажот, илинж истаб бошини минг деворга урётганлар ҳалиям бор орамизда. Касаба уюшмаларининг хотин-қизлар муаммолари бўйича куну-тун ишлайдиган – 1211 “Ишонч телефони” орқали кўплаб оилавий ҳаёти қил устида туриб қолган аёллар турмушига мазмун олиб кирилаяпти. Гўдаклар оила, ота бағрига қайтарилаётган ҳолатлари ҳам оз эмас.

Мана шундайлардан бири. Жомбойлик С.А. (турмушидаги рўшнолик боис тўлиқ исми шарифини келтирмадик) ҳам дардини касаба уюшмалари билан бўлишди. Унинг маълум қилишича, турмушига дарз кетган. Оқибатда бир нафар фарзанди билан изза йиғлаб ота уйига қайтибди. Фарзанди учун алимент белгиланса-да, турмуш ўртоғи хорижда ишлаб юрганлиги туфайли суд қарори ижро топмаганлигини баён этади. Касаба уюшмалари МИБ органларидан мазкур мурожаатни тегишлилик даражасида ҳал этишни сўраганди.

Мусофирчиликда, яқинларидан йироқда бўлган одам юрт, қавми-қариндош, оила қадрини чуқурроқ англаб етаркан. Жомбойга қайтган куёв МИБ талабига рўбарў келади. Яқинлари ундови, жамоатчилик унга алимент ота бўлолмаслигини тушунтиргач, дарз кетган оиласини тиклади.

− Касаба уюшмалари шарофати билан ёшлар ярашиб, оила тикланди. Мурғак жиянимизни отаси билан топиштирган жамоат ташкилотига рахмат айтиб қўйинг, − дейди ушбу хушхабарни бизга етказган келиннинг аммаси Гулмира Сафарова.

Пайариқ туман Хўжа Исмоил маҳалласида яшовчи Дилфуза Танибердиеванинг ҳам мурожаати касаба уюшмалари томонидан ҳал этиди. У “снос”га тушган уйи масаласида муаммога дуч келаётганлигини билдирган эди.

− Касаба уюшмалари аралашуви билан Дилфузанинг бузилишга тушган хонадонининг баҳоланган қиймат суммаси тўлиқ тўлаб берилди,−дейди Хўжа Исмоил маҳалла фуқаролар йиғини раиси Жамол Нарзиев. − Ҳозирда бу оила маҳалламиз ҳудудида, замонавий тарзда барпо этилган кўп қаватли уйлардан бирига жойлашди.

Дилфуза Танибердиева эса жамоат ташкилотдан беҳад миннатдор.

− Ўзим дуч келган алимент муаммосини касаба уюшмаларининг 1211 “Ишонч телефони”га етказгандим, − дейди қўшработлик Г.Абдулакимов. − Мурожаатим ўз фурсатида ечим топганидан мамнунман.

Инсон қадри улуғлигини янада кўтариш учун интилаётган касаба уюшмалари ҳеч кимни ўз дарди билан ёлғиз қолдирмайди. Бу ташкилот сизу-бизга кўмакка ҳамиша тайёр.

Нурилла Шамсиев,
“Ишонч”