Ўзбекистон касаба уюшмалари Федерацияси Хоразм вилоят кенгаши томонидан “Бутунжаҳон болалар меҳнатига қарши кураш куни” муносабати билан “Тараққиёт аниқ, аммо қилинадиган ишлар кўп: келинг, саъй-ҳаракатларни тезлаштирайлик!” шиори остида ташкил этилган тадбирлар вилоятдаги барча оромгоҳларни қамраб олди.

Хусусан, Хонқа туманидаги “Жайҳун қуёши” оромгоҳида бўлиб ўтган асосий тадбирда турли соҳалар вакиллари — касаба уюшмалари фаоллари, ҳамкор ташкилотлар вакиллари, спортчилар, санъаткорлар, ота-оналар ҳамда оромгоҳда дам олаётган болалар иштирок этишди.

Хоразм вилоят кенгаши раиси Гулсара Қурбонбоева ўз сўзида болаларнинг ҳуқуқлари ва манфаатларини ҳимоя қилиш, уларни турли оғир меҳнат турларидан асраш, соғлом ва бахтли болаликни таъминлаш мамлакатимизда амалга оширилаётган инсонпарвар сиёсатнинг устувор йўналишлардан бири эканини таъкидлади.

Болалар иштирокида маданий ва спорт дастурлари ташкил этилди. Қўғирчоқ театри томошалари, бадиий гимнастикчилар ва каратэчилар чиқишлари, қўшиқ ва рақслар, шеърхонлик баҳслари барчага катта хурсандчилик бағишлади. Сана муносабати билан расмлар танлови ўтказилиб, фаол иштирокчилар эсдалик совғалари билан тақдирланди. Фавқулодда вазиятлар бошқармаси томонидан кўргазмали чиқишлар ташкил этилди.

Тадбир сўнгида болажонлар осмонга ранг-баранг шарлар учириш орқали ўз қувончларини ифода этишди.

М.Тўрабоева