Кўпчилик бир умр бошқаларни бой қилиш учун ишлаганини жуда кеч тушунади. Натижада ўзини ҳеч қачон бадавлат бўлолмайдиган муҳтож одамдек ҳис этиб, барча истакларини ноаниқ муддатга ортга суради.

Девид Бахнинг "Латте омили" асаридаги бош қаҳрамон ҳам «қурбим етмайди» дея кўп нарсада, ҳатто орзуларида ҳам ўзига чекловлар қўйган. У тасодифан танишиб қолган кекса бариса эса қизга ўзи ўйлаганидан анча бадавлатроқ эканини тушунтириб беради.

Асарнинг бош қаҳрамонлари — Зои, Ҳенри ва Барбара. Сюжетнинг асосий қисми уларнинг суҳбатидан ташкил топган. “Латте омили” Зои исмли қиз ҳақида. У онасининг вафот этишидан бир неча ой аввал афсус-надоматларсиз, бахтли яшашни исташини айтиб суҳбатлашади. Мана шу ҳикоя муаллифнинг бувиси Роуз Бах билан бўлган сўнгги суҳбатга асосланган. Роуз Бах айтиб берган ҳикоя Девид Бахнинг кейинги ҳаётини бутунлай ўзгартириб юборади. Муаллифнинг ёзишича, унинг бувиси тиришқоқ, ажойиб аёл бўлган. 30 ёшида бутун оиланинг тақдирини ўзгартириб юборадиган қарор қабул қилади. Муаллиф, таниқли молиявий таҳлилчи, молиявий эркинликнинг учта асосий омилини кўрсатиб беради. Маълум бўлишича, ҳамма нарса жуда осон ва содда, ва энг муҳими - бу омилларнинг барчаси ишлайди! Сиз қилишингиз керак бўлган нарса - кундалик вазифаларингизни бироз ўзгартириш ва аллақачон ўзингиз хоҳлаган нарсага пул тежабгина қолмасдан, балки сармоя киритишни ҳам бошлашингиз мумкинлиги ҳақида сўз боради.

Роуз Бах набираси Девид Бахга берадиган энг катта маслаҳати: ҳеч нимадан афсусланмай, таваккал қилиши керак эканини уқтиради. Бувиси ўлими олдидан шундай насиҳат қилади: "Ёдингда бўлсин, қай йўлдан юришни билмай, чорраҳада туриб қолсанг, ичингда иккита овозни эшитасан: биринчиси, катта одамнинг товуши – “хавфсиз йўлни танла, ўзингни хатарга отма!”, дейди. Иккинчиси ёш бола “Мана бу йўлдан юр, Девид, бу қизиқ бўлади. Кел. Ҳаракат қилиб кўрамиз!”, дея ундайди. Ичингдаги мана шу қизиққон ва ўйнагиси келган болакайнинг сўзларига қулоқ тут. Унинг ташқарига чиқиб ўйнашига қўйиб бер. Дўстларингга ҳам шундай маслаҳат бер”.

Маблағни назорат қилиш ва молиявий эркинликла эришишни истаган барчага ушбу асарни тавсия қиламан.

Маҳмудахон АБДУСАЛОМОВА
Тошкент давлат ўзбек тили ва адабиёти университети
2-босқич талабаси