Бир неча кун олдин журналист Аброр Зоҳидовнинг телеграм каналида ўтказган “Гул ёки бир кило гўшт?” мазмунидаги сўровномаси ёдимга тушди. Кўпчилик “бир кило гўшт”ни танлагани ўйга толдирганди. Аёллар, эҳтимол, гулнинг гўзаллигидан кўра болаларининг қорни тўқ бўлишини устун қўйишгандир. Бу бир томондан аёлнинг меҳрини, оилапарварлигини, тежамкорлигини ифодаласа, иккинчидан, оилаларнинг иқтисодий шароитларини ҳам фош қиларди. Аслида аёлларнинг барчаси ҳам гулни яхши кўради. Шуларни ўйлаб, устозимга у яхши кўрадиган атиргуллардан танлашга қарор қилдим.

Шу пайт эшик секин очилиб, ичкарига эр-хотин кириб келди.

— Гулларингизнинг энг чиройлиси қайси? — деб сўради эркак.

Бу ғалати савол диққатимни тортди ва ялт этиб ортга қарадим. Во дариғ... эркакнинг кўзлари ожиз эди...

Аёл эса мулойим овозда “Энг ифорлисини беринг”, - деди.

Гулчи бир оз ўйланиб турди-да, энг қиммат гулдасталардан бирини олди. У чиндан-да ҳам гўзал, ҳам ёқимли ифор таратаётганди.

— Неча сўм?

— Эллик минг.

Ҳайрон бўлиб гулчига қарадим. Худди шундай гулдастни ҳозиргина бир пўрим кийинган йигит 500 минг сўмга олиб кетганди.

Аёл гулни қўлига олди. Сўнг эркакка ҳидлаш учун берди.

— Қандай гўзал ҳид келяпти, — деди у шивирлаб.— Сенга ёқдими?

— Жуда.

— Демак, энг чиройлиси шу экан.

Улар дўкондан чиқиб кетишар экан, юзимда табассум, кўзларимда нам қалқди. Мени суюнтирган бу воқеа сизни ҳам қувонтиради деган ниятда қоғозга туширдим...

Муҳаббат Тўрабоева