Қиш совуғи забтига олиб ачитаётган кунларда Маҳмуджон акани уста Қодирхон эрталабдан йўқлаб қолди. Худога шукр, унинг хонадони газ билан исийди. Икки бети қизариб, кўйлагининг устидан чопонини ташлади-да, ташқарига қаради.

Уста узоқдан-узоқ салом-аликдан сўнг, нимадир демоқчи бўлардию, лекин айтолмасди.

- Қўшни бостирмангиз томида қуруқ ўтин босиб қўйгандек бўлгандингиз. Ўша турибдими?,- ва ниҳоят ёрилди, у. - Қишлоқдаги ногирон, кекса аммам сандалда ўтирган экан, кеча ҳосил бериб турган ўригини кесиб, ўтин қилиб бердим. Агар йўқ демасангиз, пулини ҳам берардим. Шундан озгина олиб бориб берсам, сандалда бўлса ҳам қишдан бир амаллаб чиқиб оларди, аммам бечора.

Маҳмуд акага устанинг гаплари жуда таъсир қилди. Беш хонали уйини табиий газда ҳаммом бўлиб исиётганию шўрлик онахонинг сандалда кун кўраётганлигини тасаввур қилди.

- Уста, пулингиз ҳам керакмас, керагича олиб чиқиб кетаверинг, - деганича, уйидан бир сиқим пул олиб чиқди.

- Мана буни ҳам онахонга бериб қўйинг, - деди, секин.

Ўша дамда руҳи ажиб бир енгилликни ҳис қилгандай бўлди...

Буни қаранг, кўпинча ҳеч нимадан ками йўқ, оқ ёқалик казо-казоларни тўйу, маъракаларимизга таклиф қилиб, эҳсон қилиб, дуо олган бўламиз. Лекин минг афсус, бу йиғинларимизга биронта бева-бечорани ёки ногирон инсонни таклиф қилмаймиз. Ҳолбуки, улуғларнинг айтишича, дунёда энг ёмон зиёфат қорни оч қолиб қорни тўқ таклиф қилинган зиёфат. Аслида бу ишимиз билан исрофгарчиликка йўл қўяётганимизни билмаймиз.

Савоб эса оёғимиз остида. Фақат бироз эътиборлироқ бўлсак бўлгани.

Анваржон ҲАЛИМОВ