Қиш яқин: кўп қаватли уйларда яшовчиларни нималар кутмоқда?
Қурилиш ва уй-жой коммунал хўжалиги вазирлигига кўра, куз-қиш мавсумига тайёргарлик доирасида республика бўйича 9 812 та кўп квартирали уйда таъмирлаш ишлари режалаштирилган. Ушбу мақсадлар учун 244 миллиард сўм маблағ йўналтирилиб, уйлардаги том, ертўла, фасад, кириш йўлаклари ҳамда ички муҳандислик тармоқлари таъмирланди.
Шунингдек, 1,5 мингта кодли темир эшик, 14,6 минг кв.м ойнаванди фрамуга ва 70 мингга яқин энергия тежамкор чироқ ўрнатилди. Давлат дастурлари ва маҳаллий бюджет маблағлари ҳисобига қўшимча 4 мингдан ортиқ уйда таъмирлаш ишлари амалга оширилди.
Куз-қиш мавсумини барқарор ўтказиш учун зарур материаллар захираси — 207 минг кв.м шифер, 36 минг дона задвижка ва вентил, 145 минг погонометр ва ҳар хил турдаги қувурлар, 379 тонна қум-туз аралашмаси ва бошқа жиҳозлар тайёрлаб қўйилди.
Шунингдек, 505 та лифтни янгилаш ишлари режалаштирилган бўлиб, ҳозирга қадар 301 таси ўрнатилди, яна 108 тасида ишлар давом этмоқда.
Кўп квартирали уйларда энергия самарадорлигини ошириш мақсадида қуёш панеллари ва гелиоколлекторлар ўрнатиш ишлари йўлга қўйилган. Шу билан бирга, ҳукуматнинг тегишли қарори ижроси доирасида кўп қаватли уйларнинг 195 минг кв.м фасад қисми базальт изоляция материали билан қопланди. Бу орқали 20 миллион кВт электр энергияси ва 2,8 миллион куб метр газ тежалиши кутилмоқда.
Долзарб мавзулар
Mақолага баҳо беринг
0/50
0
0
0
0