Савол: Мен техник ходим бўлиб ишлайман. Иш хақимнинг ярмини огоҳлантиришсиз ушлаб қолишибди. Бунинг сабабини сўрасам, қисқартириш келган, дейишди. Айтингчи, огоҳлантиришсиз ҳам ойликдан ушлаб қолиш мумкинми?

Саволга Ўзбекистон касаба уюшмалари Федерацияси Тошкент вилояти кенгаши меҳнат-ҳуқуқ инспектори Машраб Мирзаев қуйидагича жавоб берди:

– Меҳнат кодексининг 269-моддаси иш ҳақидан ушлаб қолишни чеклаш ҳақида. Умумий қоидага кўра, ходимнинг ёзма розилиги билан, ходимнинг розилиги бўлмаган тақдирда эса, ушбу модданинг иккинчи қисмига мувофиқ иш ҳақидан ушлаб қолиниши мумкин.

Меҳнат кодексининг 269-моддасида кўрсатилган асослар билан иш берувчи сизнинг иш ҳақингиздан ёки таътил пулингиздан ушлаб қолиши мумкин. Лекин қисқартириш келгани учун иш ҳақингиздан ушлаб қолиши мумкин эмас. Сиз бу ҳолатда Адлия бўлимига ёки прокуратурага ариза беришингиз керак. Улар ҳолатни ўрганиб чиқиб, сизга ушлаб қолинган иш ҳақингизни қайтариб олишда амалий ёрдам беради.