Бугун яна шу йўлакдан қайтаётганимда пиёдалар йўли бўйлаб сочилиб ётган чиқиндиларни кўриб ҳайратда қолдим.
Аввалига "эҳтимол, ёнидаги чиқинди қутиларидан шамол учириб юборгандир" деб ўйлаб, йиғиштиришга киришдим. Афсуски, улар орасида шамолнинг кучи етмайдиган оғирликдаги – ичида суви бор пластик идишлару егулик қутилари ҳам бор эди.

Кейин эсладим: Форумлар саройи олдида бир неча кундан бери "Жазз" фестивали ўтаётган бўлиб, кечга яқин юзлаб одамлар концерт томоша қилишаётган эди.

Мана шундай оммавий тадбирлар – концертлар, фестиваллар, спорт ўйинлари вақтида экологик маданиятимизнинг асл даражаси яққол кўриниб қолади. Доим чиройли, озода турадиган кўча бир кунда аҳлат уюмига айланаётган бўлса бу – шунчаки бепарволик эмас, балки маданиятсизликнинг энг аянчли кўринишидир.

Биз жамият сифатида ҳалигача оддий ҳақиқатни англаб етмадик: тозаликка масъул фақат ободонлаштириш ходимлари эмас. Ҳар ким ўзидан кейин йиғиштиришни, ўзини тартибга чақиришни ўрганмас экан, энг гўзал масканлар ҳам ахлатхонага айланиб боравериши турган гап.

Ўзини ҳурмат қилмайдиган одамнинг табиат ҳақида жон куйдириши амримаҳол. Пойтахтдай жойда мана шундай манзаранинг гувоҳи бўлиш ўта ачинарли ҳолат эмасми? Бугун бу кўчадаги ахлат- нотозалик эмас, балки баъзи одамларнинг дунёқараши, тарбияси, маданият даражасининг кўзгуси ҳамдир.

Эъзоза УМУРЗОҚОВА
ishonch.uz