Мазкур низом 2024 йил 15 январдаги ПҚ–22-сон ва Ҳукуматнинг 2024 йил 24 июлдаги 445-сон қарорларига мувофиқ институт томонидан жамоат хавфсизлигини таъминлаш ва жиноятчиликка қарши курашиш соҳасида шартнома асосида пуллик хизматлар кўрсатиш тартибини белгилайди.

Ушбу низомга кўра, жисмоний ёки юридик шахс институтга жамоат хавфсизлигини таъминлаш ва жиноятчиликка қарши курашиш соҳасида экспертлик, илмий-тадқиқот, ноширлик, матбаа ва қонунчиликда тақиқланмаган бошқа фаолиятни амалга ошириш учун ўз ихтиёрига кўра мурожаат қилади.

Институтнинг илмий таркиб лавозимидаги ходими эса шартнома асосида ҳақ эвазига юқоридаги фаолиятни амалга ошириш бўйича хизмат кўрсатади.

Пуллик хизматлар кўрсатишдан тушадиган маблағлар институтнинг бюджетдан ташқари ривожлантириш жамғармасига тўлиқ йўналтирилади.

Пуллик хизматлар прейскуранти (нархлари) эса бозор конъюнктурасидан келиб чиққан ҳолда институт бошлиғи томонидан тасдиқланади ҳамда уларга институт томонидан ўзгартириш ва қўшимчалар киритилиши мумкин.

Шунингдек, мазкур низом лойиҳасида қуйидаги асосий масалалар назарда тутилган:

• Институт томонидан жамоат хавфсизлигини таъминлаш ва жиноятчиликка қарши курашиш соҳасида шартнома асосида пуллик хизматлар кўрсатишнинг ҳуқуқий механизмлари;
• Институт томонидан кўрсатиладиган пуллик хизматлар турлари;
• Институт томонидан кўрсатиладиган пуллик хизматларни кўрсатиш ва тўлов миқдорини белгилаш тартиби;
• Институт томонидан пуллик хизмат кўрсатишдан тушган маблағларни сарфлаш тартиби.

Буйруқ лойиҳасининг қабул қилиниши бюджет ва бюджетдан ташқари маблағлардан қўшимча харажат ажратилишини талаб этмайди.