Jomboy tumani Nayman qishlog'ida yashovchi Gulmira Safarova ham kasaba uyushmalariga ilinj bilan murojaat qildi. To'g'ri, u pul ham, boshqa ashyolar ham so'ramadi. Turmushi buzilib, 2 nafar farzandini yolg'iz o'zi tarbiyalayotgan nogiron ayol oyoqqa turmoqchi. Qo'rasida qo'y, og'ilxonasida mol bo'lsa, qaddini tiklab olishiga ishonadi. Ammo ularni sotib olishga qo'li kaltalik qilayotgan ekan. Kredit ajratilishida yordam berilishini istaydi.

Aslida bu masalaning har bir hududda mas'ullari bor. Kambag'al oilalar bilan ishlovchi tashkilotlarga davlat tomonidan bir olam vakolatlar ham berib qo'yilgan. Ammo kasaba uyushmalari ko'mak so'rovchining ra'yini qaytarmadi. Murojaat o'z vaqtida mutasaddilar e'tiboriga havola etildi. Joriy yilning 3 mart kuni masalaning yechimi to'g'risida tuman hokimi X.Nazarov imzolagan xabarni ham oldi. Unda Gulmira Safarovaga milliy bankning tuman filiali tomonidan o'n million so'm miqdorida chorva krediti ajratilib, muammo hal etilgani «mamnuniyat» bilan ma'lum qilingandi. Bir muhtojning tashvishi arisa kim ham yengil tortmaydi, deysiz. Axir o'z aravamni o'zim tortaman, deya intilayotgan odamni qo'llashdan ham ortiq savobli ish bormi? Shunday bo'lsa­da, Gulmira Safarovaga qo'ng'iroq qilib, hol so'radik...

– «Ishonch telefoni»ga chiqqanimdan so'ng meni mahalladagi hokim yordamchisi Shahboz O'ktamov idoraga chaqirdi, – dedi u. – Menga chorva krediti olishim uchun bankka «onlayn» ariza berishim lozimligini tushuntirib, murojaatim hal bo'ldi, e'tirozim yo'q, deb yozdirib oldi. Men uning «Bu masala nazoratimizda bo'ladi», degan gaplariga laqqa tushibman... Darvoqe, ayol bankka bergan chorva krediti so'roviga javobni ko'p kutmadi. Oradan ikki­uch kun o'tmasdan bankdan «Onlayn arizangiz rad etildi» degan «pishakning qulog'idek» xat keldi. Bunga sabab – ayolning qarzdorligi ekan. – O'g'lim dars qoldirgani tufayli maktab tomonidan 400 ming so'm jarimaga tortilganimdan, bu haqdagi qaror majburiy ijro byurosi tomonidan ijroga qaratilganidan mutlaqo xabarim yo'q edi, – deydi Gulmira.

– Nogironlik nafaqam chiqsa, jarimani to'layman. Ammo bankirlarning «Endi kredit so'rab kelmang, bu masalada eshiklarimiz sizga yopiq», degan gaplari suyak­suyagimdan o'tib ketdi... «Kambag'alni urma, so'kma, ko'ylagini yirt!» qabilidagi bu ishdan hayratlanadi kishi. «Qo'ng'irot» mahallasidagi hokim yordamchisi to'qigan yolg'onga kimsan – tuman hokimi ko'zini chirt yumib imzo chekkaniga qoyil qolmasdan ilojingiz yo'q. Xo'sh, tumanda fuqarolar murojaatiga berilgan bunday yolg'on javoblar qancha ekan?

Nurilla ShAMSIEV,
ishonch.uz