Қадимдан бой тарих ва эзгу анъаналарга эга халқимиз минг йиллардан буён турли миллат ва элат вакиллари билан бирдамликда яшаб келмоқда. Қўшничилик ва миллатлараро тотувлик – бу инсониятнинг энг юксак қадриятларидан биридир. Турли маданиятлар ўртасида ҳурмат ва ҳамжиҳатликни таъминлаш жамиятни ривожлантириш, тинчлик ва барқарорликни сақлашда муҳим аҳамиятга эга.

Баҳорий байрамлар шукуҳи давом этаётган айни кунларда юртимизнинг чегарадаги, турли миллат вакиллари истиқомат қилиб келаётган маҳаллаларида “Қудратимиз бирлик ва ҳамжиҳатликда” шиори остида халқ сайллари ташкил этилмоқда.

Ушбу байрам тадбирлари Ўзбекистон, Тожикистон ва Қирғизистон Президентларининг Хўжанд шаҳридаги йиғини ўтказилаётган тарихий кунга тўғри келгани ҳам бежиз эмас.

Жиззах вилояти, Бахмал туманидаги Музбулоқ қишлоғида ўтказилган “Миллатлар дўстлиги” байрам сайлида туман ҳокимлиги, нуроний отахонлар, ёшлар, маҳалла фаоллари билан биргаликда Қирғизистон республикасидан келган меҳмонлар ҳам иштирок этишди. Музбулоқ қишлоғида азалдан қирғиз миллатига мансуб қардошларимиз истиқомат қилади. Тили, дини, маданияти ва урф-одатлари ўзаро яқин бўлган ўзбек ва қирғиз халқарини қўшничилик, биродарлик ва қуда-андачилик ришталари бирлаштиради.

Тадбир қатнашчилари қирғиз халқининг бой маданияти, мусиқа ва куй-қўшиқларини тинглаб, бу халқнинг ўзига хос урф-одатлари ва қадриятларини яхшироқ англаш имкониятига эга бўлишди. Фольклор жамоалари томонидан ижро этилган куй-қўшиқлар ва миллий рақслар байрамга алоҳида файз бағишлади.

Қўйлар сўйилиб, дошқозонларда палов дамланди, сумалак, патир, ғилминди, кўк сомса каби миллий таомлар пиширилди. Бир дастурхон атрофига йиғилганлар юртимизга тинчлик-тотувлик тилаб дуо қилишди.

– Миллатим – қирғиз, – дейди Бахмал туманидаги 21-қирғиз умумтаълим мактаби ўқитувчиси Гулнора Нурманова. – Лекин Ўзбекистондай жаннатмакон юртда туғилиб-ўсдим, таълим олдим. Ҳозирда уч нафар фарзанднинг онаси, етти нафар набираларнинг меҳрибон бувисиман. Бутун дунё ҳавас қилса арзийдиган тинч-осойишта юртимизда эмин-эркин яшаб, меҳнат қилаяпман.

– Бахтимиз шу юртда туғилганимиз, тинч-тотувликда яшаётганимиздадир, – дейди меҳнат фахрийси Алишер Ўтаев. – Тўғриси, дунёнинг турли нуқталарида содир бўлаётган қирғинбарот урушлар, қашшоқ мамлакатлар, етим қолаётган болалар ҳақида эшитиб дилимиз қанчалик хира тортса, Ўзбекистондай жаннатмакон, тупроғида олтин гуллайдиган юртда яшаётганимиздан шукроналик туямиз.

Айтиш жоизки, вилоятимизда яшаётган қирғиз халқи учун ўз тили, маданияти, урф-одатларини ривожлантириш, келгуси авлодга етказишлари учун имкониятлар яратилиб берилган. Биргина мисол, Бахмал туманидаги 8 та мактабда таълим тўлиқ қирғиз тилида олиб борилаётганлиги қардош халқларимизга бўлган ҳурмат ва эътибор наъмунасидан дарак беради.

Тадбирлар доирасида маҳаллалар ҳудудида турли миллат вакиллари иштирокида “Дўстлик боғлари” барпо этилди. Тўқувчилик, тикувчилик, гиламдўзлик, заргарлик, кулолчилик ва ёғоч ўймакорлиги каби ҳунармандчилик йўналишлари намойиш қилиниб, тадбир қатнашчиларига ўзларини синаб кўриш имконияти берилди.

Миллий ўйинлар – кураш, оқ теракми – кўк терак, куч синаш, арқон тортиш, кўпкари сингари мусобақалар байрам сайлининг эсда қоларли жиҳати бўлди. Болалар иштирокидаги “варраклар сайли” эса барчага кўтаринки кайфият улашди.

“Адабий кўприк” композицияси доирасида қирғиз халқининг атоқли адиби Чингиз Айтматов ва бошқа буюк аждодлари адабий меросини акс эттирувчи китоблар кўргазмаси ташкил қилинди. Шу билан бирга, “Манас” халқ эпосининг бахшилар томонидан куйланиши қардош халқларимизнинг тарихи ва адабиёти билан яқиндан танишиш имконини берди. Ёшлар ўртасида дўстлик ва ҳамжиҳатлик, тинчликни мустаҳкамлашга қаратилган расмлар танлови, баҳру-байт, шахмат ва шашка мусобақалари ташкил этилиб, ғолибларга эсдалик совғалари топширилди.

“Ҳайит оши – тинчлик, дўстлик ва бағрикенглик оши” шиори остида эҳтиёжманд оилаларга хайрия жамғармалари йиғилди.

Бу Марказий Осиё халқларига хос бўлган инсоний анъаналар ҳамон давом этиб келаётганидан далолатдир. Мазкур тадбирлар эса мана шу қадриятларни янада мустаҳкамлаш, дўстлик ришталарини абадийлаштиришга хизмат қилади.

Машҳура ЖЎРАҚУЛОВА

“ISHONCH”