Савол: Вақтинча ишсизман. Бир танишим ўзи билан мавсумий юмушларга чиқишимни сўраяпти. Хўш, мавсумий ишнинг қонунан белгиланган тартиб-қоидалари борми? Унинг давомийлиги қанча, иш ҳақи қандай тўланади, таътилга чиқиш мумкинми? Шулар ҳақида маълумот берсангиз.

Сарвар САЙРИДДИНОВ Тошкент вилояти

Жавоб: Мавсумий ишлар деб иқлим ва бошқа табиий шароитлар туфайли муайян давр давомида бажариладиган юмушларга айтилади. Унга доир муносабатлар ҳам амалдаги қонунлар билан тартибга солинади. Хусусан, олти ойдан ортиқ давр (мавсум) ичида амалга оширилиши мумкин бўлган айрим мавсумий ишларнинг рўйхати ва унинг давомийлигини Вазирлар Маҳкамаси белгилайди.

Мавсумий ишга ходим меҳнат шартномаси тузиш йўли билан қабул қилинса, қонуний ҳисобланади. Ходимлар жалб қилинганда синов муддати белгиланмайди. Меҳнат ҳақи миқдори, вақти ва тартиби меҳнат шартномасида кўрсатилиши шарт.

Мавсумий ходимлар ишнинг ҳар бир ойи учун камида икки календарь кун ҳисобидан ҳақ тўланадиган меҳнат таътили олиш ҳуқуқига эга.

Агар ёлланма ходим тўлиқ мавсум ишлаган бўлса, унга кейинчалик меҳнат шартномасини бекор қилган ҳолда ҳақ тўланадиган меҳнат таътили берилади. Бу ҳолда таътилнинг охирги куни меҳнат шартномаси бекор қилинган кун деб ҳисобланади. Меҳнат шартномаси бекор қилинганда ҳақ тўланадиган меҳнат таътили ўрнига ходимнинг хоҳишига кўра, пулли компенсация тўланади.

“Ishonch” газетаси ҳуқуқ ва халқаро ҳаёт бўлими