Энди хусусий секторда ишловчи аёлларга ҳам ҳомиладорлик нафақаси давлат томонидан тўланади
2026 йилдан бошлаб ҳомиладорлик нафақаси Ижтимоий ҳимоя жамғармаси томонидан тўлаб борилади. Худди шу йилнинг иккинчи ярмидан эса вақтинча меҳнатга лаёқатсизлик, яъни касаллик варақаси бўйича нафақаларнинг тўланиши ҳам Ижтимоий ҳимоя жамғармасига ўтказилади.
Оддий қилиб айтганда, эндиликда ҳомиладорлик ва меҳнатга лаёқатсизлик нафақаларини иш берувчи эмас, балки давлат тўлайди.
Хусусий секторда, яъни давлатга тегишли бўлмаган корхона ва ташкилотларда ишлаётганлар сони расман 3 миллион 600 минг нафардан ортиқ.
Тизим ишга тушиши билан, яъни 1 январдан бошлаб хусусий секторда ишлайдиган аёллар ҳам туғуруқ таътилига чиққан тақдирда ижтимоий суғурта орқали нафақа олиш имкониятига эга бўлади.
Нафақа миқдори иш стажига боғлиқ бўлиб, фуқаролар ёки тадбиркорлар томонидан тўланган ижтимоий солиқ ва даромад солиғи миқдорига қараб белгиланади. Иш стажидан келиб чиқиб нафақа миқдори ҳам ўзгарувчан бўлади.
Шунингдек, эндиликда ёлланма ишчи сифатида меҳнат қилаётган ва касал бўлиб қолган фуқаролар ҳам даромадини йўқотмайди, чунки ижтимоий суғурта орқали уларнинг йўқотилган даромадини қоплаш имконияти яратилмоқда.
Бу тизим 2026 йил 1 июлдан ишга туширилади.
Долзарб мавзулар
Mақолага баҳо беринг
0/50
0
0
0
0