Реимбурсация бу "рем"- “қоплаб бераман” деган маънони билдириб, унинг мақсади беморларнинг молиявий юкини камайтириб, дори воситаларига бўлган эҳтиёжини қоплашдир. Ушбу дастур 2022 йилда бошланган бўлиб, ҳудудларда босқичма-босқич кенгайтирилмоқда. Ҳозирги кунда реимбурсация дастури Тошкент шаҳар, Қорақалпоғистон Республикаси, Сирдарё, Самарқанд, Навоий, Хоразм, Бухоро ва Қашқадарё вилоятларида жорий этилиб, 2026 йил якунигача республиканинг барча ҳудудларини қамраб олиши режалаштирилган.

Ушбу дастур ривожланган мамлакатлар тажрибасини ўрганиш асосида жорий этилиб, аввалига 5 турдаги касалликларга 11 хил дори воситалари бепул берилаётган эди. Вазирлар Маҳкамасининг 619-сонли қарорига асосан эса касалликлар турлари кенгайтирилди ҳамда 5 турдаги эмас, 12 турдаги касалликларга 28 хилдаги дориларнинг бепул берилиши йўлга қўйилди.

Беморлар оилавий шифокорига бориб, текширувдан ўтишади ва касалликлари аниқланган ҳолатда, уларга шифокор томонидан электрон рецепт расмийлаштирилиб берилади. Даволанувчи махсус смс код орқали Давлат тиббий суғуртаси жамғармаси билан шартномага эга бўлган дорихоналардан дори воситаларини бепул олади. Уларнинг харажатлари давлат тиббий суғуртаси томонидан кафолатланади.

2025 йил бу тизим асосида 1 миллион 300 нафардан ортиқ беморлар бепул дорилар билан таъминланган. Уларга 2500 миллиондан ортиқ электрон рецептлар расмийлаштирилиб, 90 млрд сўмга яқин маблағлар тўланган.

– Маълумки, электрон рецепт барча дори воситаларига ёзилади. Реимбурсация дастуридаги электрон рецепт эса бевосита давлат томонидан кафолатланган бепул дори воситалари учундир. Уларнинг харажатлари 100 фоиз давлат томонидан қопланади, – дейди Давлат тиббий суғуртаси жамғармаси реимбурсация бўлими бошлиғи Зафар Сабиров.

Дори воситалари рецепти бериладиган касалликлар рўйхати:

1. Артериал гипертония (қон босими)

2. Юрак ишемик касаллиги

3. Қандли диабет 2-тур

4. Бронхиал астма

5. Ўпканинг сурункали обструктив касаллиги (ХОБЛ)

6. Юрак етишмовчилиги сурункали шакли

7. Аритмиянинг айрим турлари

8. Гипотиреоз (қалқонсимон без фаолияти пасайиши)

9. Яра касаллиги (меъда ва 12 бармоқ ичак)

10. Ревматоид артрит ёки сурункали бўғим касалликлари

11. Депрессиянинг айрим турлари (узоқ даволаш талаб қиладиган)

12. Эпилепсия

Севара Азизова,

ЎзЖОКУ талабаси