“Роналдо” бошлиқ гуруҳ фош этилди: Андижонда ёлланма қотилликка уриниш бартараф этилди
Андижон вилоятида тадбиркорни пул эвазига ўлдиришга уриниш ҳолати ўз вақтида фош этилди. Бу ҳақда Андижон вилояти Ички ишлар бошқармаси ахборот берди.
Маълум қилинишича, шу йил 4 февраль куни вилоятда фаолият юритувчи якка тартибдаги тадбиркор туман ички ишлар бўлимига мурожаат қилиб, унга суиқасд тайёрланаётгани ҳақида хабар берган. Унинг билдиришича, беш нафар шахсдан иборат уюшган жиноий гуруҳ 1500 АҚШ доллари эвазига уни қасддан ўлдириш учун ёлланма ижрочи билан келишувга эришган.
Мурожаат асосида Андижон вилояти Ички ишлар бошқармаси, Давлат хавфсизлик хизмати ҳамда вилоят прокуратураси ходимлари ҳамкорлигида Пахтаобод туманида махсус тезкор тадбир ўтказилган.
Тадбир давомида 2000 йилда туғилган, муқаддам судланган шахс тадбиркорни ўлдириш эвазига келишилган пулнинг бир қисми — 300 минг сўмни олаётган вақтида ашёвий далиллар билан қўлга олинган.
Тезкор ҳаракатлар давомида жиноий гуруҳнинг бошқа аъзолари ҳам аниқланиб, ушланган. Тергов маълумотларига кўра, “Роналдо” лақаби билан танилган, 1984 йилда туғилган шахс гуруҳга бошчилик қилган. Гумонланувчилар орасида аввал судланганлар, шунингдек, тиббиёт муассасаси раҳбари ва 2003 йилда туғилган талаба ҳам борлиги маълум қилинди.
Ҳолат юзасидан Ўзбекистон Республикаси Жиноят кодексининг 25, 97-моддалари (қасддан одам ўлдиришга суиқасд) билан жиноят иши қўзғатилган. Тергов ҳаракатлари давом этмоқда.
Долзарб мавзулар
Mақолага баҳо беринг
0/50
0
0
0
0