Bundan roppa-rosa 41 yil oldin dunyoda qiziq va ayni damda xavotirli voqea ro'y berdi. 1984 yil 11 avgustda Amerika Qo'shma Shtatlarining 40-prezidenti Ronal'd Reygan texniklar iltimosiga ko'ra o'z mikrofonini sinab ko'rish vaqtida Sovet Ittifoqi bilan yadroviy urush haqida hazil qildi. Tabiiyki, Moskvada bu haqiqiy tahdid sifatida qabul qilindi. O'sha kuni Reygan Kaliforniyaning Santa-Barbara shahrida Milliy jamoat radiosida qisqacha chiqish qilishga tayyorlanayotgan edi. Texniklar uskunani prezidentning ovozi darajasiga moslashtirayotgandi – bu radioda odatiy protsedura sanaladi.