«Avvaliga bitta tabletka etardi. Keyin esa to‘rttasini ichsam ham taʼsir qilmay qoldi. Bir yarim oy ichida psixotrop moddalarga 30 ming dollar va 32 gramm tillamni sarflab yubordim. Oxiri esa qamoqqa tushdim. Bugun ortga nazar tashlasam, yo‘qotganlarim topganlarimdan ming karra ko‘p ekan...»

Bu so‘zlar ayni paytda jazoni ijro etish muassasasida jazo o‘tayotgan yosh ayolga tegishli. Uning hikoyasi nafaqat bir inson taqdiri, balki yoshlar orasida psixotrop moddalarga qaramlik qanday og‘ir oqibatlarga olib kelishi mumkinligini ham ko‘rsatadi.

Ishonch.uz muxbiri Zangiota tumanidagi 21-son jazoni ijro etish koloniyasida jazo o‘tayotgan mahkuma bilan suhbatlashdi.
Uning so‘zlariga ko‘ra, qahramonning bolaligi oson kechmagan. Onasi uzoq yillar xorijda mehnat qilgan, akasi qamalgan, keyinchalik turmush o‘rtog‘i ham ozodlikdan mahrum etilgan. Mahkumaning taʼkidlashicha, aynan shu oilaviy muhit uni ko‘cha hayotiga yaqinlashtirgan.
U bugungi kunda qilgan xatolaridan qattiq afsuslanayotganini, eng og‘ir yo‘qotishi farzandi ekani va yana yaqinlarining ishonchini yo‘qotganini aytdi.

Feruza RAHIMOVA,
Mirnodir MIRAKMALOV
Ishonch.uz