"Dunyo prezidentlarini ikki metr masofadan ko'raman deb o'ylamagandim" — faxriy qorovul ayol
Ishonch.uz sayti ijodkorlari Milliy gvardiya faxriy qorovuli harbiy xizmatchilari faoliyatiga nazar tashladi. So'nggi paytlarda rasmiy tashrif va davlat tadbirlarida ayollarning ham faxriy qorovullar safida chiqayotgani yangilik emas. Biroq har safar harbiy sohada erkaklar bilan bir teng ishlayotgan xotin-qizlarni ko'rganimizda g'ururlanamiz.
Qahramonimiz Umida Matyoqubova, yaqindagina IHT sammitiga tashrif buyurgan nufuzli mehmonlarni kutib olgan faxriy qorovullardan biri.
— Oddiy oilaning qiziman, — deydi u. — Yoshligimdan “harbiy bo'laman, forma kiyaman” deganimda ota-onam qiz bolaning sohasi emas, deb fikrimdan qaytargan. Qarshi davlat universitetining chet tillar fakul'tetini tugatgach, bir yil o'qituvchilik sohasida ishladim. Yuragimdagi harbiy bo'lish istagi hech tinchlik bermasdi. "Milliy gvardiya tarkibida harbiy bo'lib ishlashni istaysizmi?” degan savol orzularimni yanada alangalatdi va imtihonlarda qatnashdim. Omadim bor ekan. Avvalo bilimim, bo'yim balandligi va sog'ligim harbiy sohada ishlashimga yo'l ochdi.
O'qituvchidan harbiyga aylandim. Umrimda qurol ushlamaganman. Uni ishlatish, qaytadan yig'ishni o'rgandim. Quyoshda, oftob ostida soatlab mashq qilgan kunlarimiz qo'llarimning terisi shilinib ketgan.
Men hech qachon dunyoning birinchi raqamli shaxslarini ikki metr masofadan tirik uchrataman deb o'ylamagandim. Mana shunday baxt bizning boshimizga qo'nganidan xursandman.
Jurnalist: Feruza Rahimova
Tasvir va montaj: Quvonch To'raev
Maqolaga baho bering
0/50
0
0
0
0