"Mahalla yettiligi" xulosasiga asosan Ijtimoiy reestrdagi I guruh nogironligi bo'lgan va mehnatga layoqatli a'zosi bo'lmagan oilalar xonadonlarining devor va tomlarini izolyatsiya qilish, energiya tejamkor deraza va eshik hamda quyosh panellari yoki geliokollektor o'rnatish ishlari amalga oshiriladi.

Og'ir toifadagi tumanlarda oilaviy tadbirkorlikni rivojlantirish dasturlari doirasida kreditlar yillik 12 foiz stavkada ajratib boriladi.

Tadbirkorlarning barqarorlik reytingini aniqlashda tasdiqlangan norasmiy bandlik holatlari hamda xodimlarga mehnatga haq to'lashning eng kam miqdoridan past oylik ish haqlarining hisoblanishi bilan bog'liq qonunbuzilish holatlari ballarni kamaytiruvchi qo'shimcha mezon sifatida belgilanadi.

Tijorat banklari tomonidan amalga oshirilayotgan “mahalla loyihasi” dasturi doirasida mahallalar ixtisoslashuvini chuqurlashtirish bo'yicha ajratiladigan kreditlar foiz stavkasining bir qismiga quyidagi tartibda kompensatsiya taqdim etiladi:
- mahsulot yetishtirishga qaratilgan loyihalar bo'yicha kreditlar foiz stavkasining 4 foizlik punkti;
-qo'shimcha qiymat yaratadigan qayta ishlash loyihalari bo'yicha kreditlar foiz stavkasining 6 foizlik punkti.

Xulq-atvori buzilishlari bo'lmagan ruhiy kasallik bo'yicha dispanser nazoratida turuvchi dementsiya, Parkinson yoki Al'tsgeymer kasalligi tashxisi qo'yilgan shaxslar uchun kunduzgi qatnov asosida qarab turish xizmati ko'rsatiladi.

Davlat xaridlari bo'yicha maxsus axborot portalida davlat xaridi predmetining o'rtacha bozor narxini sun'iy intellekt texnologiyalari asosida hisoblab beruvchi elektron modul' ishga tushiriladi.

“Inson” markazlarida ijtimoiy himoyaga muhtoj bolalarning ota-onalari uchun “mehrli oila” xizmati tashkil etiladi.

Tadbirkorlik faoliyatiga oid davlat xizmatlari va ayrim xususiy xizmatlarni tadbirkorlarga “yagona darcha” tamoyili asosida ko'rsatish bo'yicha “Biznes hamroh” loyihasi amalga oshiriladi.

“Biznes hamroh” loyihasi doirasida Savdo-sanoat palatasi huzurida tashkil etiladigan mas'uliyati cheklangan jamiyat tomonidan boshqariladigan “Biznes hamroh” markazlari faoliyati yo'lga qo'yiladi. Dastlabki bosqichda “Biznes hamroh” markazlari Toshkent va Nukus shaharlarida hamda viloyatlar markazlarida 1 tadan tashkil etiladi.

BHMning 1000 baravarigacha bo'lgan quyidagi nizosiz talablar bo'yicha notariuslar tomonidan ijro xatlari yozish tartibi joriy etiladi:
-notarial tasdiqlangan bitimlarga asoslangan talab;
-yozma va notarial tasdiqlangan bitim mavjud bo'lgan taqdirda, undiruvni qarzdorning majburiyatlari bajarilishining ta'minoti bo'lgan ko'char mol-mulkka qaratish to'g'risida talab;
- ijara to'lovlari, ko'p kvartirali uylardagi joylarning mulkdorlaridan majburiy badal va to'lovlar, kommunal va aloqa xizmatlari bo'yicha qarzdorlikni undirish to'g'risida talablar.

vafot etgan shaxsning o'limi qayd etilgandan so'ng uning eri (xotini), ota-onasi, farzandlarining YaIDXP (my.gov.uz) dagi shaxsiy kabinetiga o'lim qayd etilgani haqida QR-kodli ma'lumotnoma bepul yuboriladi.

Reyting natijasiga asosan, yiliga 2 marotaba eng yaxshi sun'iy intellekt loyihalarini joriy etgan vazirlik va idoralar o'rtasida “Sun'iy intellekt bo'yicha eng yaxshi loyiha” tanlovi o'tkaziladi.