Ba'zi ish beruvchilar uchun xodim go'yoki bir “detal”. Xohlagan paytda uni ishdan quvishi, o'rniga boshqa xodimni joylashtirishi mumkindek. Aslidachi? Har bir ishlovchi manfaati qonunlar doirasida himoyalanishi kerak. Garchand u kasaba uyushmalariga a'zo bo'lmasa-da.

Shohista Yo'ldosheva Jomboy tumanida joylashgan “MANСhICO” (gigienik vositalar ishlab chiqaruvchi) qo'shma korxonada qadoqlovchi vazifasida ishlab kelgan. Salomatligidagi o'zgarish bois ma'muriyatga ariza bilan chiqib navbatdagi mehnat ta'tili berishlarini so'raydi. Ish beruvchi taklifi bilan o'z hisobidan mehnat ta'tili oladi. Belgilangan ta'til muddatda sog'lig'ini tiklab ishga qaytgan Shohista ne ko'z bilan ko'rsinki, uning o'rniga boshqa xodim ishlayotgan ekan.

Ma'muriyat esa o'z hisobidan ta'tilga chiqqan xodimni he yo'q, be yo'q bo'shatib, allaqachon yangi xodimni uning o'rniga rasmiylashtirgan bo'lib chiqdi. Aksiga olib, bu korxona kasaba uyushmalari a'zoligida emas, xodimlar ham jalb etilmagan. Ammo xodim duch kelgan muammoga jamoat tashkiloti befarq bo'lmadi. Uning arizasiga binoan qo'shma korxona rahbarlari bilan muzokaraga kirishildi. Kasaba uyushmalari mehnat huquq inspektsiyasi muloqoti asnosida Shohista Yo'ldosheva o'z vazifasiga tiklandi. Bekor yurgan kunlari uchun mehnat haqi undirib berildi.

Ulug'bek G'aniev,
O'zbekiston kasaba uyushmalari Federatsiyasi,
Samarqand viloyat kengashi mehnat huquq inspektori.