Muloqotda soha xodimlarining yurtimizda olib borilayotgan islohotlarning mazmun-mohiyati va natijalarini xalqimizga yetkazishdagi jonbozligi, yurtdoshlarimiz hayotida ijobiy o'zgarishlar yuz berishi maqsadida qilayotgan mehnatlari e'tirof etildi. Uchrashuvda jurnalistlar oldida turgan vazifalar, jumladan, milliy kontent yaratish masalalari ham muhokama qilindi.

Mehmonlar 2024-yildan chiqa boshlagan, Kasaba uyushmalari Federatsiyasi muassisligidagi «Vatan» jurnalining dunyo axboriy makonidagi ahamiyati, xususan, jurnal sahifalaridagi kontentlarning tarixiy o'zligimizni anglatishga xizmat qilayotganini ta'kidlashdi.

– Jurnalistlarni igna bilan quduq qaziydigan soha egalari, desam, adashmayman, – dedi «Saodat» jurnali bosh muharriri Munavvara Usmonova. – Bugungi davrada ko'plab hamkasblarimiz bilan diydor ko'rishib turganimdan xursandman. Har yili kasb bayramimiz arafasida Kasaba uyushmalari Federatsiyasi kasbdoshlarimiz quvonchiga sabab bo'lib kelyapti. O'tgan yili ham bir xodimimizning farzandi kasal bo'lib, operatsiya stoliga yotqizishi zarur bo'lib qolganida, Kasaba uyushmalarining e'tibori va g'amxo'rligi uning joniga oro kirgandi. Bu yil esa, mana, yana ko'plab jurnalistlarga bayramona kayfiyat ulashmoqda. Bu ishlarning boshida turgan Kasaba uyushmalari Federatsiyasi raisi Qudratilla Rafiqovga minnatdorchiligimizni bildiramiz.

Bolaligimizda adiblarning «Osmonimiz musaffo!» degan so'zlarini shunchaki oddiy gap deb o'ylardik. Mana endi bu shunchaki oddiy gap emasligini tobora chuqurroq angayapmiz va tinchligimizga ko'z tegmasin, deymiz!

Davra suhbatida tajribali ustoz jurnalistlar Sharof Ubaydullaev, Abdusaid Ko'chimov, Tursunali Qoratoev, Asadjon Xodjaev va yana bir guruh soha faollari so'zga chiqib, mamlakatimizda yaratilgan so'z erkinligi, jurnalistlarga ko'rsatilayotgan e'tibor haqida gapirdilar. Tadbir yakunida jurnalistlar Kasaba uyushmalari tomonidan rag'batlantirildi.

Zebo NAMOZOVA
Quvonch TO'RAEV
E'zoza UMURZOQOVA