Hayron bo'ldim. Bunaqa paytda kasaba uyushmasi yig'ilish o'tkazmaydimi, ikki tomonni eshitmaydimi? Ishxona tartib-qoidalarini buzgan deb topishsa, birinchi navbatda ogohlantirish berilishi yoki jarima qo'llanishi kerak emasmi, birdaniga ishdan bo'shatishlari qanchalik to'g'ri?

Men bundan tushkunlikka tushib qoldim. Shundan so'ng, ma'muriyatning bu qarori bo'yicha bir nechta tashkilotlarga murojaat qildim. Ular tashkilotning bu harakati noqonuniyligini aytishdi, biroq hech kim yordam bermadi. Endi nima qilaman, axir oilamning yolg'iz boquvchisi bo'lsam, kamiga ikkita voyaga yetmagan farzandim bor. Shundoq ishdan bo'shatib yuboraverishadimi, deb anchagacha o'ylandim. Bir kuni Xotin-qizlarni himoya qiladigan 1211 Ishonch telefoni borligini bilib qoldim va murojaat qildim. Buni qarangki, murojaatimning ertasigayoq bu masala bo'yicha kasaba uyushma qo'mitasining yig'ilishi o'tkazildi. Unda kasaba uyushma qo'mita a'zolari “Bekobodtsement” AJ tomonidan meni ishdan bo'shatish so'ralgan xatga rozilik berishmadi. Tortishib qolgan hamkasbim bilan ham yarashtirib qo'yishdi.

Hozir avvalgiday ishlab, bola-chaqamni halol oyligim bilan boqib yuribman. Meni tushkun ahvoldan chiqargan, og'irimni yengil qilgan kasaba uyushmalariga cheksiz minnatdorligimni bildiraman. Yaxshi insonlar doim bor bo'lishsin!

Zarina Urushova,
Bekobod shahri