Navro'z va Ramazon hayiti arafasida Toshkentdan hududlarga qo'shimcha avtobuslar yo'lga chiqadi
Navro'z bayrami hamda Ramazon hayiti oldidan Toshkent shahridan respublika hududlariga qo'shimcha avtobus qatnovlari yo'lga qo'yiladi. Bu haqda Transport vazirligi ma'lum qildi.
Qayd etilishicha, Toshkent avtovokzalidan mavjud reyslarga qo'shimcha ravishda har kuni shaharlararo yo'nalishlarda 70 dan ortiq qo'shimcha avtobuslar harakatlanadi.
Ushbu qatnovlar Zomin, Samarqand, Jarqo'rg'on, Buxoro, Qorako'l, Mirbozor, Navoiy, Jo'sh, Nurota, Zarmitan, Zarafshon, Xatirchi, Qiziltepa, Konimex, Uchquduq, Kadan, Payariq, Shahrisabz, Qarshi, G'uzor, Sherobod, Termiz, Denov, Uzun, Urganch, Xiva, Gurlan, To'rtko'l va Nukus yo'nalishlari bo'ylab amalga oshiriladi.
Qatnov jadvali va chipta narxlari bilan avtovokzalning rasmiy ijtimoiy tarmoq sahifalari orqali tanishish mumkin. Shuningdek, chiptalarni avtovokzal kassalarida yoki “UzBus” mobil' ilovasi orqali onlayn xarid qilish imkoniyati mavjud.
Bayram kunlari munosabati bilan e'lon qilingan qo'shimcha dam olish kunlarida aholining hududlararo harakatlanishiga bo'lgan talabni to'liq qondirish maqsadida yo'lovchilar oqimiga qarab qo'shimcha reyslar uzluksiz ravishda tashkil etiladi.
Shu bilan birga, jarayonlarni samarali nazorat qilish uchun Transport vaziri topshirig'i asosida vazirning birinchi o'rinbosari rahbarligida Toshkent avtovokzalida tezkor shtab faoliyat yuritmoqda.
Eslatib o'tamiz, Ramazon hayiti munosabati bilan 20 mart kuni Toshkentda jamoat transporti harakati ertalab soat 04:00 dan boshlanishi avval xabar qilingan edi.
Maqolaga baho bering
0/50
0
0
0
0