Qozog'istonda ishlayotgan o'zbek muhojirlariga Qozog'iston hukumatining tegishli hujjatlarsiz mamlakatda bo'lib turgan xorijlik fuqarolarni deport qilayotgani haqida tarqalayotgan xabarlar yuzasidan rasmiy tushuntirish berildi.

Tashqi mehnat migratsiyasi agentligining bildirishicha, ijtimoiy tarmoqlarda Qozog'istonda vaqtincha mehnat faoliyatini amalga oshirayotgan hujjatlarsiz va migratsiya qonunchiligini buzgan chet davlatlar fuqarolaridan joriy yil 10 noyabridan 21 noyabrigacha mamlakatni tark etishi so'ralgan xabarlar tarqalgan. Bu esa Qozog'iston hududida ishlab yurgan o'zbekistonliklar o'rtasida keng tarqalib, turli tushunmovchiliklarni yuzaga keltirgan.

Rasmiy bildiruvga ko'ra, ushbu xabarlar haqiqatga to'g'ri kelmaydi.
Ma'lumot uchun, Qozog'iston hukumatining 2022 yil 31 dekabrdagi 1146-sonli qaroriga asosan, O'zbekiston fuqarolari Qozog'iston davlat chegarasini kesib o'tgan kundan boshlab, 30 kungacha bo'lib turishi mumkin. Ammo, umumiy bo'lish muddati 180 kalendar kuni davomida 90 kalendar kunidan ko'p bo'lmasligi kerak, ya'ni fuqaro uzluksiz 90 kalendar kunidan ortiq Qozog'istonda bo'lib turish mumkin emas.

Qozog'istonga ishlash maqsadida boryotgan O'zbekiston fuqarolari uchun 30 kun ichida ish beruvchi bilan mehnat shartnomasini tuzgach, uni Xalqqa xizmat ko'rsatish markazida ro'yxatga kiritib, 3 oygacha bo'lgan muddat uchun ishlash va yashash uchun ruxsatnoma olish yoki salohiyatli ish beruvchilar tomonidan kvota asosida ishga jalb qilish tartibi mavjud.