BMT Bosh Assambleyasi Isroilni Jo'lon tepaliklarini ozod qilishga chaqiruvchi rezolyutsiyani qabul qildi. Hujjatda Jo'lon tepaliklari “Isroil bosib olgan” hudud sifatida tilga olingan.

Bosh Assambleya yig'ilishida 91 davlat vakillari (jumladan, O'zbekiston ham) rezolyutsiyani qo'llab-quvvatlagan. Sakkiz davlat (jumladan AQSh va Buyuk Britaniya) hujjatga qarshi ovoz berdi. Yana 62 davlat ushbu rezolyutsiya uchun ovoz berishda betaraf qoldi.

Hujjat ko'rib chiqish uchun Misr, Iordaniya, Iroq, BAA va Suriya vakillari tomonidan taqdim etilgan.

Isroilning BMTdagi doimiy vakili Gilad Erdan rezolyutsiya qabul qilingandan so'ng, uning mamlakati ushbu hujjat talablarini bajarishni imkonsiz deb hisoblashini bildirdi.

“Biz bu rezolyutsiya matniga qat'iy qarshimiz va uni printsipial jihatdan amalga oshirmoqchi ham emasmiz. Bu BMT hozirda Isroilga nisbatan adekvat qarorlar qabul qila olmayotganining yana bir tasdig'i bo'ldi”, – deydi u.

Ma'lumot uchun, Jo'lon tepaliklari 1967 yilgacha Suriya hududi bo'lib, olti kunlik urush paytida Isroil tomonidan bosib olingan va keyinchalik yahudiy davlati tarkibiga kiritilgan. Jo'lon tepaliklarining 1981 yilda Isroil tarkibiga qo'shib olingani esa xalqaro hamjamiyat tomonidan tan olinmadi. Jumladan, BMT Xavfsizlik Kengashining tegishli rezolyutsiyasi Isroilning Jo'lon ustidan suverenitetini rad etdi.

Shundan buyon bu hududning qaytarilishi ham arab-isroil urushining sabablaridan biriga aylangan.