Har kuni ertan tongdan to kechgacha xaridor va savdogarlarning tinimsiz harakati va shovqin-suron hukm suradigan “O'rikzor bozori” MСhJ kompleksida bugun bayram shukuhi. Sababi, Tadbirkorlik, biznes va xizmat ko'rsatish sohalari xodimlari tomonidan Kasaba uyushmalarining 120 yilligi munosabati bilan “Kasaba uyushmalari harakati – mehnatkashlarning 120 yillik birdamlik ramzi” shiori ostida ko'ngilochar tadbir o'tkazildi. Ushbu bayramda tadbirkorlar, orastabonlar va xaridorlar, bozorga ishi tushgan inson borki hammasi qatnashishdi. Unda yosh va mashhur san'atkorlar go'zal kuy-qo'shiqlar ulashib, bayramga o'zgacha fayz kiritdi.

Tadbir davomida so'zga chiqqanlar Kasaba uyushmalari Federatsiyasining harakati, amalga oshirilayotgan islohotlar, mehnatkashlarning mamnuniyati haqida to'xtalib o'tishdi. – O'zbekiston kasaba uyushmalari Federatsiyasi mehnatkashlarning turli qatlamlariga e'tibor qaratadi. Bugungi tadbir ham bozorimizdagi tadbirkor va xodimlarni xursand qilish, bayramona kayfiyatni ulashish, ularni qo'llab-quvvatlashga qaratilgan, – deydi “O'rikzor bozori” mas'uliyati cheklangan jamiyati Kasaba uyushmasi raisi Ten Lyudmila Anatolevna.

– Har kungi bir xil ish muhiti, bozor ovozi, turli xaridorlarning injiqligi odamni biroz charchatadi. Ammo mana shunday yuqori saviyadagi ko'ngilochar tadbirlarning o'tkazilishi hammasini unuttiradi, – deydi tadbirkor Nodiraxon Fayzieva.

Ushbu flashmop ko'rinishidagi bayram dasturi Kasaba uyushmalarining nafaqat mehnatkashlarning ijtimoiy-iqtisodiy huquqlarini himoya qilish, balki ularning madaniy hordiq chiqarishlari uchun ham g'amxo'rlik qilishining yaqqol namunasi bo'ldi. Mehnatkashlarning bunday tadbirlarda ishtirok etishi ularning ishga bo'lgan motivatsiyasini oshiradi, jamoada sog'lom muhit yaratadi va o'zaro hamjihatlikni mustahkamlaydi.

Diyora Ravshanova
Ishonch.uz