Eng quvonarlisi, bu kabi ilg'or g'oyalar endi yurtimizdagi maktab o'quvchilari tomonidan ham hayotga tatbiq etilmoqda. Uchqo'rg'on tumani 25-umumta'lim maktabi 11-sinf o'quvchisi Diyorbek Qo'qonboev zamonaviy talablarga to'la javob beradigan “Aqlli issiqxona” qurilmasini yaratdi.

Yosh muhandisning ixtirosi tomchilatib sug'orish va o'g'it integratsiyasiga asoslangan bo'lib, masofadan boshqarish imkoniyatiga ega. Amaliy sinovlarda kichik hajmli bo'lishiga qaramay, mazkur moslama 15 kilogrammgacha hosil yetishtirish samarasini bergani esa uning amaliy ahamiyatini yanada oshirdi.

Diyorbek bu qurilmani sinovdan o'tkazish jarayonida “Kross F” navli pomidor urug'ini ekib, yiliga ikki marotaba hosil olishga muvaffaq bo'ldi. Hozirda u tumandagi tomat ishlab chiqaruvchi zavod bilan hamkorlikda bir sotix maydonga pomidor ekish va undan 1,5 tonna hosil olish imkoniyatini sinab ko'rishni rejalashtirmoqda.

Mazkur loyiha nafaqat hosildorlikni oshirish, balki O'zbekiston qishloq xo'jaligini raqamlashtirish, resurslarni tejash va mahalliy iqlim sharoitiga mos texnologiyalarni joriy etishda ham beqiyos ahamiyatga ega.

E'tiborlisi, yosh ixtirochi o'z “Aqlli issiqxona”siga bo'lgan huquqlarni mustahkamlash maqsadida bu yilning o'zida uni patentlashtirishga kirishmoqchi.

Anvarjon Halimov,
ishonch.uz