Musobaqada 25 dan ortiq mamlakatdan 2 mingdan ziyod triatlonchi ishtirok etmoqda. Ularning 15 nafari professional sportchilar, jumladan, norvegiyalik Kristian Blummenfelt, Gustav Eden, germaniyalik Riko Bogen, Daniya vakili Laura Madsen va boshqa taniqli triatlonchilardir.

Turizm markazidagi dunyodagi eng yaxshi uchta kanallardan biri bo'lgan eshkak eshish kanalida shu yilning may oyida ushbu sport turi bo'yicha jahon kubogini bahslari bo'lib o'tgan edi.

O'zbekiston triatlon federatsiyasi, Sport vazirligi, Milliy olimpiya qo'mitasi, Samarqand viloyati hokimligi hamda boshqa hamkor tashkilotlar ko'magida galdagi musobaqaga qizg'in tayyorgarlik ko'rildi.

O'zbekiston triatlon federatsiyasi bosh kotibi Yelena Kun ushbu musobaqani o'tkazishdan maqsad va bu galgi turnirning ahamiyati haqida fikrlarini bildirdi.

– Triatlon bo'yicha "Challenge Samarkand" xalqaro musobaqasini o'tkazishdan asosiy maqsad, mamlakatimizda ushbu sportning ommaviyligini rivojlantirish va aholining sportga qamrovini oshirishdan iborat. Biz butun dunyo bo'ylab ko'p sonli muxlislarni jalb qilamiz. Ushbu musobaqada har qanday sportchi ishtirok etishi mumkin. Biz ularga yordam beramiz, qo'llab-quvvatlaymiz, yo'l ko'rsatamiz hamda mamlakatimizda triatlon sportini rivojlantirish uchun bor imkoniyatlarimizni ishga solamiz va ommalashtiramiz.

Mutaxassislarning e'tirof etishicha, musobaqani tashkil etish orqali turizmni va aynan sport turizmini rivojlantirish ko'zda tutilgan. Sababi har bir ishtirokchi oilasi va do'stlari bilan keladi. Boy tariximiz va madaniyatimiz, ko'hna shahardagi qadimiy obida va yodgorliklar, me'morchilik, urf-odatlarimiz bilan tanishish imkoniyatiga ega bo'lishadi.