O'zbekiston energetika, neft'-gaz va geologiya xodimlari kasaba uyushmasi respublika kengashi, “Yangi Angren IES” AJ birlashgan kasaba uyushma qo'mitasi bilan hamkorlikda tashkil etilgan ushbu tadbirda Toshkent viloyati kambag'allikni qisqartirish va bandlik boshqarmasi, “O'zagrosug'urta” AJ Toshkent viloyati boshqarmasi vakillari, “To'raqo'rg'on IES”, “Farg'ona IEM”, “Muborak IEM” filiallari va “Talimarjon” AJ xodimlari, bir nechta ishlab chiqarish korxonalarining mehnatni muhofaza qilish va xavfsizlik texnikasi xodimlari ishtirok etdi.

Seminarda so'zga chiqqanlar korxonalarda faoliyat yuritayotgan mehnatni muhofaza qilish va jamoatchilik vakillarining kasbiy bilim va malakasini muntazam oshirib borish, ishlab chiqarish bilan bog'liq bo'lgan baxtsiz hodisalarning oldini olishda ishchilarning ham sergakligi, bilimi muhimligi to'g'risida ta'kidlab o'tdilar.

– Baxtsiz xodisaga olib kelayotgan asosiy sabablardan biri – bu xodimlarda mehnat amaliyoti yetishmasligi, – deydi Kambag'allikni kiskartirish va bandlik boshqarmasi mehnat inspektsiyasi davlat mehnat texnik inspektori Orif Begimov. – Hozir aksariyat ish beruvchilar tomonidan qurilish sohasida amaliyot o'tamagan ishchilar ishga qo'yilmoqda. Bu esa bilim ko'nikmaga ega bo'lmagan ishchilarning tan jarohatiga, xatto o'lim holatlariga ham olib kelmoqda. Bugungi kunda dunyo miqyosida davlatlar ishchilarning xavfsizligini ta'minlashda zamonaviy texnologiyalarga asoslangan yangi yondashuvlarni qo'llashmoqda. Jumladan, internet texnologiyalari, masofaviy monitoring tizimlari, sensorlar va sun'iy intellekt yordamida xavfli vaziyatlarni oldindan aniqlash va tezkor javob choralarini ko'rish imkoniyatlari oshmoqda. Bugungi seminarda ham imkon qadar shular to'g'risida kengroq ma'lumotlar berdik.

Seminar davomida bino tashqarisida tashkil etilgan turli mehnat muhofazasi ko'rgazmasi yig'ilganlar e'tiborini tordi. Xodimlar vazifalari bo'yicha bir-biri bilan suhbat qurib, o'zaro tajriba almashindilar. Tashkilotchilar tomonidan bu kabi seminarlar foydadan xoli bo'lmasligi va muntazam tashkil etib borilishi aytildi.

Shokir Hazratkulov,
O'zbekiston kasaba uyushmalari Federatsiyasi
Toshkent viloyati kengashi mehnat-texnik inspektori