Абдулла Ориповнинг бир шеърида ўқигандим, шоир Ерни Қуванинг анорига ўхшатган: «Қаршимда Ер шарин суврати турар, салмоғи Қуванинг анорича бор...» Ишончим комилки, шоир фазога чиқиб, Ерни кўриш имконига эга бўлганида бундан ҳам кутилмаган ўхшатиш топиши аниқ эди. Чунки ўша ҳолат ва кайфиятни сўз билан ифодалаш имконсиз. Дейлик, сиз гилос емаган бўлсангиз, уни ҳар қанча таърифламай, барибир таъмини ҳис қилолмайсиз-ку.

Баъзида бошқа сайёраларда ҳаёт борлигига ишонасизми, деб сўраб қолишади. Мен ўзга сайёраликлар ёки номаълум учувчи жисмларни кўзим билан кўрмаганман. Лекин табиий бошқа галактика ва сайёраларда ҳам ҳаёт бўлса керак, деб тахмин қиламан. Энг яқин юлдузга ёруғлик тезлигида икки йил учиш керак, яна айрим юлдузларга етиш учун миллионлаб йил кетади. Ўша олис юлдузларда одамзод каби, балки ундан ҳам ақллироқ мавжудотлар борлигига ишонгим келади...”, – дейди у.

Шариповнинг сўзларига кўра, у болалигида коинот ҳақида орзу қила бошлаган. Еттинчи синфдаёқ биринчи навбатда қирувчи учувчи бўлишга, кейин эса космонавтлар корпусига қўшилишга қарор қилди.

Фазогир Солижон Шарипов таъкидлаганидек, космонавтлик универсал касб. “Бу касбни эгаллаган одам ҳамма нарсага қодир бўлиши керак. У дастурчи, олим, муҳандис, учувчи ва оператор. Чунки космосда сизга ҳеч ким ёрдам бермайди”.

Солижон Шарипов, шунингдек, яхши маънода космосни ўзига жалб қилишини ва ҳатто Ерда ҳам у тез-тез космик тушлар кўришини таъкидлайди.

“Нафақат космос, мен самолётларда ҳам учаман. Коинотда бўлганингда ўзингни инсониятнинг элчисидек ҳис қилишдек ақл бовар қилмайдиган туйғуни ҳис қиласан. Гарчи биз унчалик баланд учмасак ҳам... Лекин бу Ердан тўрт юз километр баландликда”, деди у.

Эслатиб ўтамиз, Шарипов 1998 йил 23 январдан 31 январгача СТС-89 дастури бўйича 8 кун 19 соат 46 дақиқа 54 сония давом этган космик кеманинг парвоз мутахассиси сифатида коинотга учган. Кейин Россия орбитал комплекси “Мир” билан туташувга эришилди.

У 2004 йил 14 октябрдан 2005 йил 25 апрелгача иккинчи космик парвозда бўлиб, ўшанда икки марта очиқ коинотга чиққан.

“Иккинчи парвозим олти ой давом этди. Шу вақт давомида мен Россия, Ўзбекистон, Қирғизистон, Тожикистон ва бутун собиқ Совет Иттифоқи вакили бўлдим. Америкалик космонавтлар билан 193 кун коинотда бўлдик”, дея эслайди, Солижон Шарипов.

Анваржон ҲАЛИМОВ тайёрлади