Куни кеча кўзим тушиб қолди. Россияда 12 ёшли бола энергетик ичимлик истеъмол қилиши ортидан инсультга учрабти. Свердловск вилоятида истиқомат қилаётган болакай икки банка энергетик ичганидан сўнг кучли бош оғриғи ва танасининг ярми фалаж бўлиб, инсульт хавфи остида шифохонага ётқизилган. Шифокорларнинг фикрича, бола организми ўсиши туфайли, энергетик ичимлик касаллик катализатори бўлган эмиш.

Воажаб, нималар бўлаяпти ўзи? Қатиқни ҳам пуфлаб ичиб келган ота-боболаримизга сира тортмадик чоғи. Бугун ранго-ранг елим идишда жило бериб турган ичимликлар сутни ҳам айронни ҳам бир чеккага суриб ташлади. Бола бақра борки таркиби, қўшимчалари номаълум бўлган ичимликлар “жинниси”га айланган. Тўй маросимларда-ку бундай заҳар заққум қоришмали ичимликларнинг барчасини ана шу мурғаклар “кўтаради”. Оталарига арақ, болаларига энергетик ичимликлар тортиладиган маракаларимизнинг эса сон саноғи йўқ...

Яна бир тармоқда берилган мана бу хабардан эса юрак тамом музлайди. Бир ўқиб кўринга, айнан келтирамиз “Эҳтиёт бўлинг: Lit Energy энергетик ичимликлари саратонга олиб келиши мумкинлиги маълум бўлди.

Бу энергетик ичимлиги таркибида лимфома, ўсмалар ва мия шикастланишига олиб келадиган зарарли Е110 бўёғи топилган.

Эслатиб ўтамиз, бу энергетик ичимликлари машҳур блогер Михаил Литвин томонидан ишлаб чиқарилади”.
Бунга ўхшаш ичимликларни чиқаришни йўлга қўйиш, маҳсулот сифатини кафолатлаш, истеъмолга яроқли ёки яроқсиз эканлигини аниқлайдиган ташкилот борми? Шу чоққача фақат огоҳлантиришларга гувоҳ бўлиб турибмиз. Аммо ҳеч бир жойда “зарарлилиги учун” дея ишлаб чиқаришни тўхтатиш, сотувини тақиқлаш ҳолатларига гувоҳ бўлганимизча йўқ.

“Падарига лаънат, йўқот буни”, дея ойнадан улоқтириб, ҳоврингизни босар босмасингиздан телефондан яна “тириг,тиринг”. Бу галги хабар қозон ювадиган дастмол ҳақида. Нима эмиш, идиш ювадиган мачалкада идиш ювгандан кўра идишни ювмай овқат есангиз зарари камроқ бўлармиш...

Чунки мачалка, унитаздан 10 минг марта кўпроқ микробларни ўзида сақлармиш. Кўтар-э қақур-қуқурингни, дея силтамоқчи бўлган қўл билан бошни аста қашлаб қўйишдан ўзга иложингиз ҳам йўқ.

Шунақа, табиатнинг ҳам инсоннинг ҳам якка-ю ёлғиз кушандаси инсон экан…

Нурилла Шамсиев,
Ishonch.uz