Лицензия нархи 100 минг!?
Бугун хусусий университетга лицензия беришга масъул шахснинг пора билан қўлга тушгани ҳақидаги хабарни кўриб кўп нарса хаёлимдан ўтди.
ОТМлар сони ошганидан хурсанд бўламиз, аммо хусусийлардаги таълимнинг сифати борасида жуда кўп эътирозлар бор. Контрактлар қиммат, ўқишда тартиб йўқ, асосан онлайн, таълим сифати ҳақида эса…
Нега шундай? Ўйлайсизки, хусусий таълим даргоҳлари раҳбарлари фақат пул учун ўтирибдими? Наҳотки, уларни ўз университетлари рейтинги, нуфузи ўйлантирмаса… Ўйлантиради, албатта. Аммо хусусий таълим муассасаларининг таннархи…Мана шу масалани очиқ-ойдин кўрмадикми бугунги хабар орқали?
Битта университет филиалининг лицензиясига 100 минг доллар кетаркан. Унинг ўзи тасарруф этадиган ўқув биносининг бўлиши шартлиги, ётоқхонаси ва ҳоказо талабларнинг барчасига худди шундай харажатлар қўшилиб бораверса, ким ҳам университети нуфузи ҳақида ўйлар экан, қани айтинг-чи?!
Демак, хусусий таълимдагилар илмий даражаси борларни кўпроқ жалб этиш, иқтидорли ўқитувчилар учун курашиш борасида ҳам ҳафсалалари пир бўлгани аниқ. Нега дейсизми? Нега бўларди, уларнинг ҳам аслида нархлари бор, яхши ўқитувчилар яхши маош берсангизгина келади. Бу харажатларнинг ҳаммаси бояги биз норози бўлаётган контрактлар нархига қўшилиб бораверади. Осон арифметика.
Бир сўз билан айтганда, олий таълимда кириш имтиҳонларидаги коррупцияни йўқотганимиз рост чиқар, аммо бу ёқда болалаб кетган унданда оқибати ёмон коррупцион ҳолатлар ҳақида жиддий, кескин ва муросасиз куршга ўтмасак, сон ортидан қувишдан фойда йўқ!
Нима демадингиз?
Зебо Намозова,
Ishonch.uz
Долзарб мавзулар
Mақолага баҳо беринг
0/50
0
0
0
0