«…O'z vazifangizni vijdonan va sidqidildan bajarib, nafaqat ishchi-xodimlarning, balki ularning oila a'zolari va farzandlarining ijtimoiy-iqtisodiy manfaatlarini himoya qildingiz…

O'zbekiston kasaba uyushmalari Federatsiyasiga kelgan navbatdagi minnatdorlik maktubida ana shunday so'zlar bitilgan.

Gap shundaki, Toshkent viloyati, Quyichirchiq tumanida joylashgan «TST Agro Cluster» MСhJ rahbariyati 135 nafar xodimning bir yillik maoshini bermay kelgan. Mehnatkashlar ham ish beruvchining yolg'on va'dalariga ishonib, ish haqlarini sabr bilan kutishgan. Ammo puldan hadeganda darak bo'lmagan. Oxir-oqibat ular Federatsiyaga murojaat yo'llashgan.

Darhaqiqat, bir jamoada astoydil, vijdonan mehnat qilsangu, halol ishlab topgan haqingni ololmasang, alam qiladi. Bunaqa vaziyatda kimga dodingni aytishni bilmaysan. Agar biron tashkilotga arz qilsang, sen ishxonadagi gapni ko'chaga olib chiqqan sotqinga aylanasan. Lekin har qanday vaziyatda inson o'z huquqi uchun kurashishi kerak. Zotan, haq berilmaydi – olinadi! Ayniqsa, qonunlarni pisand qilmaydigan, mehnatkashlarning ish haqini tuya qiladigan noinsof rahbarlarni aslo ayamaslik lozim.

– Xodimlarning shikoyat-arizasi Agrosanoat majmui xodimlari kasaba uyushmasi Respublika kengashi raisi Rustam Xolmatov tomonidan tegishli tartibda nazoratga olinib, sa'y-harakatlar boshlab yuborildi, – deydi kengashning mehnat inspektsiyasi boshlig'i Ashad Musulmonov. – Xususan, ishchi guruh holatni joyiga chiqqan holda batafsil o'rgandi.

Ma'lum bo'lishicha, «TST Agro Cluster» rahbariyati bu harakati bilan mehnat qonunchiligi hamda jamoa shartnomasida belgilangan talablarni qo'pol ravishda buzgan. Oqibatda ish haqidan qarzdorlik 14 milliard 760 million 965 ming 681 so'mga yetgan.

Agrosanoat majmui hodimlari Respublika kengashi mehnatkashlarning qonuniy manfaatlarini ko'zlab, dastlab ish beruvchiga ko'rsatma xati kiritdi. Ammo bundan naf chiqmadi. Shundan so'ng ish sudga oshirildi. Olib borilgan sa'y-harakatlar natijasida 135 nafar xordimning ish haqi to'liq to'lab berilishiga erishildi.

Yaxshiyam, O'zbekiston kasaba uyushmalari Federatsiyasiga murojaat yo'llabmiz, – deydi xodim Asilbek Baxtiboev. – Aks holda, yana qancha sarson-sargardon bo'lib, oylik maoshlarimizni ololmay yurgan bo'lardik. Axir, bir yil qisqa muddat emas. Shu vaqt oralig'ida ishchi-xodimlarning boshidan o'tgan qiyinchiliklar faqat o'zlariga ayon. Ularning ham oilasi, ro'zg'ori bor. Tashvishlari yetarli. Biz, ishchi-xodimlarning manfaatlarini ko'zlab, amaliy yordam bergan kasaba uyushmalari mutasaddilariga minnatdorlik bildiramiz.

G'ulomjon Mirahmedov

ishonch.uz