Shunday tadbirlardan biri, "Eng ulug', eng aziz" ko'rik-tanlovining respublika bosqichi g'oliblarini taqdirlash marosimi bo'lib o'tdi. Unda jurnalistlar, shoir va yozuvchilar, ijod ahli hamda keng jamoatchilik vakillari ishtirok etdi. Tanlovning respublika bosqichiga 7 ta nominatsiya bo'yicha 366 nafar ijodkor tomonidan 1900 dan ortiq ijodiy ishlar taqdim etilgan.

Qatnashuvchilarning ishlari mavzuning dolzarbligi, "Yangi O'zbekiston" g'oyasining ifodasi, tahlili, asarning badiiy qimmati, mustaqillik g'oyasining aks etishi va o'ziga xosligi kabi me'zonlar asosida saralab olindi.

– Tanlovga taqdim etilgan ijodiy ishlar rang-barang va turli janrlarda yaratilgan. Ularda mustaqillik yillari, ayniqsa, so'nggi 8-9 yil ichida amalga oshirilayotgan islohotlar samaralari, Uchinchi Renessans poydevorini yaratish yo'lida qo'yilayotgan qadamlar o'z aksini topgan. Shuningdek, jamiyatdagi yutuq va muammolar, oldinda turgan muhim vazifalar hamda ularni hal etish yo'llari ham ijodkorlar nigohidan chetda qolmagan, – deydi O'zbekiston Jurnalistlar uyushmasi raisi Xolmurod Salimov.

"Eng ulug', eng aziz" tanlovining "Bosma OAV xodimlarining eng yaxshi jurnalistik ishlari" nominatsiyasi bo'yicha "Fermer iqtisodiy-ijtimoiy jurnali" bo'lim bosh muharriri Ulug'bek Jumaev 3-o'rinni, "Xalq so'zi" gazetasi Ma'naviyat bo'limi xodimi Nurilla Oston 2-o'rinni, Jurnalistlar uyushmasi a'zosi Hakim Sattoriy esa faxrli 1-o'rinni egalladi.

Tadbir g'oliblari pul mukofoti va esdalik sovg'alari bilan taqdirlandilar. Bunday e'tirof o'z ishining ustasi bo'lgan ijodkorlar uchun katta qo'llov va ishonch demakdir.

Diyora Ravshanova
Ishonch.uz