Юртимизда жамоавий спорт турларини ривожлантириш, ёшларни спортга жалб қилиш ва уларнинг иқтидорини рўёбга чиқариш давлат сиёсати даражасида қўллаб-қувватланмоқда. Бу борада Президентимизнинг 2024 йил 4 декабрдаги “Жамоавий спорт турларини ривожлантириш ва иқтидорли ёшларни саралаб олиш тизимини такомиллаштириш чора-тадбирлари тўғрисида”ги қарори яна бир муҳим қадам бўлди.

Мазкур қарор ижросини таъминлаш ва соғлом турмуш тарзини тарғиб қилиш мақсадида “Ўзсаноатқурилишбанк” (SQB) томонидан жамоавий спортга бўлган эътиборни янги босқичга олиб чиқадиган ташаббус амалга оширилди – “SQB футзал клуби” ташкил этилди.

Футзал – жамоавий руҳ ва жасорат мактаби

Футзал нафақат спорт, балки интизом, жамоавий фикрлаш, тезкор қарор қабул қилиш ва жасорат мактаби ҳамдир. Aйнан шу сабабдан SQB жамоавий спортни ривожлантиришга катта эътибор қаратмоқда.

Клуб бош мураббийлигига ўз вақтида Ўзбекистон терма жамоаси шарафини ҳимоя қилган, икки карра “Энг яхши ўйинчи” унвонига сазовор бўлган Константин Свиридов таклиф қилинди. Шунингдек, мураббийлар штабига яна бир афсонавий спортчи – Клим Тугаев ҳам қўшилди. Бу, ўз навбатида, клубнинг профессионал даражада ривожланишига бўлган эътибори юқори эканини намоён этади.

“SQB футзал клуби”нинг Ўзбекистон Футзал федерациясига расман аъзо бўлгани эса, унга маҳаллий ва халқаро мусобақаларда иштирок этиш имкониятини тақдим этади.

Анъаналардан профессионаллик сари

“SQB” жамоаси футзал соҳасида кўп йиллик тажрибага эга. 2010 йилда ташкил этилган жамоа йиллар давомида 7 карра чемпионга айланган.

Энг муҳими, жамоа сафидан бугунги кунда футзал бўйича бутун мамлакат шарафини ҳимоя қилаётган истеъдодли спортчилар етишиб чиққан. Ўзбекистон миллий футзал терма жамоасининг бош мураббийи Нодир Элибоев, дарвозабонлар мураббийи Рустам Умаров, терма жамоа аъзоси Равшан Элибоев шулар сирасига киради.

“SQB футзал клуби” ушбу анъанани давом эттирган ҳолда ўз олдига истеъдодли ёшларни тарбиялаш, уларни профессионал спортга йўналтириш ҳамда Ўзбекистон шарафини халқаро мусобақаларда ҳимоя қиладиган чемпионларни тайёрлаш мақсадини қўйган.

Бунинг учун зарур шарт-шароитлар яратилмоқда, жамоа мунтазам ўқув-машғулотларига жалб қилинмоқда. Хусусан, жорий йилнинг 15-20 март кунлари Футзал бўйича Ўзбекистон миллий терма жамоаси бош мураббийи Нодир Элибоев томонидан ташкил этилган махсус машғулотларда “SQB футзал клуби” аъзолари фаол иштирок этди.

Бугунги кунда жамоа таркиби 22 нафар футболчидан иборат. Улар профессионал мураббийлар раҳбарлигида юқори мақсадларни кўзлаб, жиддий тайёргарлик жараёнларини олиб бормоқда.

Спорт – саломатлик ва муваффақият гарови

Ўзсаноатқурилишбанкнинг кўп йиллик тажрибасида жамоавий спорт-соғломлаштириш ишлари алоҳида ўрин тутади. Зеро, жамоавий спорт фақатгина жисмоний фаоллик ёки муайян мусобақалардаги ғолибликни ифодаламай, балки у одамларни бирлаштирувчи, жамоавий ишлаш маданиятини шакллантирувчи, ирода ва жасоратни мустаҳкамловчи муҳим кучдир.

“SQB футзал клуби” ана шу ғояларни ҳаётга татбиқ этишда улкан қадамлар ташламоқда. Клуб аъзолари нафақат спорт майдонида, балки ҳаётда ҳам муваффақият қозонишни мақсад қилган.

Зебо НАМОЗОВА,
ishonch.uz